ورتالىق ازيانىڭ ءار مەملەكەتىنىڭ دامۋى بۇكىل ايماقتى كۇشەيتەدى - مەملەكەت باسشىسى
استانا. KAZINFORM - ورتالىق ازيانىڭ ءار مەملەكەتىنىڭ دامۋى بۇكىل ايماقتى كۇشەيتەدى. بۇل تۋرالى «ورتالىق ازيا - قىتاي» Ⅱ سامميتىندە مەملەكەت باسشىسى قاسىم-جومارت توقايەۆ ايتتى.
- ءبىز ورتالىق ازيانىڭ بولاشاعىن بىرگە دامۋ مودەلى رەتىندە كورەمىز، ءار مەملەكەتتىڭ جەتىستىگى بۇكىل ايماقتى كۇشەيتەدى. بۇگىندە ەلدەرىمىزدىڭ الدىندا ورتاق مىندەت تۇر - ۇلعايىپ كەلە جاتقان جاھاندىق ايقىنسىزدىق جاعدايىندا تۇراقتى پروگرەستى قامتاماسىز ەتۋ، - دەدى مەملەكەت باسشىسى.
قاسىم-جومارت توقايەۆ سونىڭ اياسىندا ساۋدا-ەكونوميكالىق بايلانىستاردى نىعايتۋ ايرىقشا مانگە يە بولاتىندىعىن ايتتى.
- قازاقستاندا ەكونوميكالىق وسىمگە سەرپىن بەرەتىن تىڭ مۇمكىندىكتەر قاراستىرىلىپ جاتىر. اسىرەسە، قىتايمەن بىرلەسكەن جوبالاردى ىسكە قوسۋعا، تاۋار نومەنكلاتۋراسىن كوبەيتىپ، كورشىلەس ەل نارىعىندا سۇرانىسقا يە ونىمدەر ەكسپورتىن ۇلعايتۋعا ەرەكشە ءمان بەرىلەدى. وڭدەلۋ دەڭگەيى ءتورتىنشى ساتىعا ساي، قوسىلعان قۇنى جوعارى ءونىم شىعاراتىن تەحنولوگيالىق كاسىپورىندار اشۋعا نيەتتىمىز. اۋىل شارۋاشىلىعى، سونىڭ ىشىندە وزىق اگروتەحنولوگيالار مەن ءتيىمدى سۋ ۇنەمدەۋ ازىرلەمەلەرىن قولدانىسقا ەنگىزۋ باعىتىنداعى ىنتىماقتاستىق وتە ماڭىزدى. بۇل رەتتە قىتاي كومپانيالارى اگروونەركاسىپ كەشەنىندەگى ءوندىرىس ورىندارىن لوكاليزاتسيالاۋ ىسىنە اتسالىسادى دەپ ۇمىتتەنەمىز. قازاقستان قىتاي نارىعىنا استىق پەن ۇن، ەت جانە ءسۇت ونىمدەرى ەكسپورتىن ۇلعايتۋ الەۋەتىنە يە. سونىمەن قاتار اۋىل شارۋاشىلىعى ونىمدەرىن قايتا وڭدەۋ سالاسىندا دا تابىستى ىنتىماقتاستىق ءۇشىن رەسۋرستار بار»، - دەدى پرەزيدەنت.
«قورعاس» قىتايمەن ساۋدا-ەكونوميكالىق بايلانىستاردا ورتالىق ازيانىڭ باستى قاقپاسىنا اينالا الادى.
- «قورعاس» حالىقارالىق شەكارا ماڭى ىنتىماقتاستىعى ورتالىعى ءبىزدىڭ ەلدەرىمىز اراسىنداعى ەكونوميكالىق ءوزارا ءىس-قيمىلعا تىڭ جاڭا سەرپىن بەرۋگە باعىتتالعان. اتالعان حالىقارالىق ورتالىق بىرەگەي ساۋدا-لوگيستيكالىق توراپ سانالادى جانە قىتايمەن ساۋدا-ەكونوميكالىق بايلانىستاردا ورتالىق ازيانىڭ باستى قاقپاسىنا اينالا الادى. قازاقستان ۇكىمەتىندە وتكەن ۋاقىتتاعى جىبەرىلگەن ولقىلىقتاردى ەسكەرە وتىرىپ، وسى باعىتتاعى تيىمدىلىكتى ارتتىرۋ ءۇشىن كۇش-جىگەردى ارتتىرۋ تاپسىرماسى بار. قازاقستان بۇگىن قول قويىلعان «ساۋدا- ەكونوميكالىق ىنتىماقتاستىقتى نىعايتۋ جونىندەگى ءىس-قيمىل جوسپارى» مەن «ورتالىق ازيا-قىتاي ونەركاسىپتىك كووپەراتسياسى جوسپارى» قۇجاتتارىن ۋاقتىلى ىسكە اسىرۋ ءۇشىن شارالار قابىلدايدى، - دەدى قاسىم-جومارت توقايەۆ.
پرەزيدەنتتىڭ پايىمىنشا، ەۋروپا مەن ازيانىڭ ءىرى وڭىرلەرىن جالعاۋدا ورتالىق ازيا باستى لوگيستيكالىق حابقا اينالىپ كەلەدى.
- بىلتىر قىتايدان ورتالىق ازيا ەلدەرى ارقىلى تاسىمالدانعان جۇك كولەمى 12 پايىزعا ارتىپ، 211 مىڭ كونتەينەردەن استى. قىتايدان ەۋروپاعا قۇرلىق جولدارىمەن جونەلتىلەتىن جۇكتىڭ 85 پايىزى قازاقستانعا تيەسىلى. ءبىز قۇرلىقارالىق بايلانىستى كۇشەيتۋگە جانە ورتالىق ازيا ايماعىنىڭ باسەكەلەستىك ارتىقشىلىعىن بارىنشا پايدالانۋعا ەرەكشە ءمان بەرەمىز. قازاقستان «ءبىر بەلدەۋ، ءبىر جول» مەگاجوباسىنىڭ العاشقى بۋىنى رەتىندە بۇل باستامانى «باتىس قىتاي - باتىس ەۋروپا»، ترانسكاسپي حالىقارالىق كولىك ءدالىزى جانە «سولتۇستىك - وڭتۇستىك» سەكىلدى ماڭىزدى ترانزيتتىك باعىتتارمەن ۇشتاستىرۋدى كوزدەيدى، - دەدى مەملەكەت باسشىسى.