ورتالىق ازياداعى ەڭ ۇزىن كوپىردە اۆتوشەرۋ ءوتتى

وسكەمەن. KAZINFORM - كەشە شىعىس قازاقستان وبلىسىنىڭ كۇرشىم اۋدانىندا بۇقتىرما سۋ قويماسى ارقىلى وتەتىن كوپىردىڭ سالىنۋىنا جانە رەسپۋبليكا كۇنىنە وراي سالتاناتتى شارالار ءوتتى.

ءوڭىر تۇرعىندارىن قۇتتىقتاعان وبلىس اكىمى ەرمەك كوشەربايەۆ كوپىردىڭ پرەزيدەنت قاسىم-جومارت توقايەۆتىڭ تاپسىرماسىمەن سالىنعانىن ەرەكشە اتاپ ءوتتى.

«بۇل كوپىردى حالىق تالاي جىل كۇتتى. ەندى ول شىعىس قازاقستاندا كاسىپكەرلىكتى، ءتۋريزمدى جانە لوگيستيكانى دامىتۋدىڭ ماڭىزدى ستراتەگيالىق نىسانىنا اينالدى»، - دەدى ايماق باسشىسى وبلىستىڭ جەتى اۋدانىنىڭ تۇرعىندارى مەن مەرەكە قوناقتارىنا سويلەگەن سوزىندە.

ەرمەك كوشەربايەۆ كوپىر قۇرىلىسىنا تەك وتاندىق ماماندار مەن قۇرىلىسشىلار تارتىلعانىن ايتتى.

«شەتەلدىك ينجەنەرلەردى ءبارى ماقتاپ جاتادى. ءبىراق ءبىزدىڭ رەسپۋبليكادا دا، وبلىستا دا ءوزىمىزدىڭ بىلىكتى ماماندار بار. ولاردىڭ تاجىريبەسى شەتەلدىكتەردەن ەش كەم تۇسپەيدى»، - دەدى ەرمەك كوشەربايەۆ.

ودان سوڭ اكىم كوپىر قۇرىلىسىنا سۇبەلى ۇلەس قوسقان ازاماتتارعا العىس حات تابىس ەتتى. ماراپاتتالعاندار قاتارىندا اباي وبلىسى اكىمىنىڭ كەڭەسشىسى ازامات قاسىم بار. ول رەسپۋبليكالىق «Egemen Qazaqstan» گازەتىنىڭ ش ق و-داعى مەنشىكتى ءتىلشىسى بولىپ جۇرگەندە پرەزيدەنتتىڭ تاپسىرما بەرۋىنە اسەر ەتكەن ماقالانى جازعان بولاتىن. سونداي-اق «كۇرشىم» پارومىنىڭ كاپيتانى التاي بەردىكپايەۆ، اعا كاپيتان سەرىك نوكەتايەۆ جانە باسقارۋشى قادىلبەك جارمۇحامبەتوۆ تا ماراپاتقا يە بولدى.

وسى كۇنى كوپىردە اۆتوشەرۋ ءوتىپ، ءتۇرلى سپورتتىق سايىستار مەن مەرەكەلىك كونسەرت ۇيىمداستىرىلدى.

وسىعان دەيىن استانادا رەسپۋبليكا كۇنىنە وراي، دەمەۋشىلەردىڭ قولداۋىمەن مەرەكەلىك وتشاشۋ ۇيىمداستىرىلعانىن جازدىق.

اۆتور
تالعاتجان مۇحامەتبەك ۇلى