ورتالىق ازياداعى ەڭ ءىرى ەلەكتروندى ساۋدا تاراتۋ ورتالىقتارىنىڭ ءبىرى قازاقستاندا اشىلادى

  استانا. قازاقپارات – 2-شىلدەدە استانادا قازاقستان- قىتاي ىسكەرلىك كەڭەسىنىڭ 7- وتىرىسى ءوتتى. ءدال وسى جيىندا «قازمۇنايگاز» بەن «سيبۋر حولدينگ» جانە Sinopec Overseas Investment Holding «سيللەنو» جوباسىنا قاتىستى حاتتاماعا قول قويدى. وسى قۇجاتتىڭ ىشىندە «قازپوشتا» ا ق مەن YTO Express Group اراسىنداعى ىنتىماقتاستىق تۋرالى كەلىسىم دە بار.

تاياۋدا وسى تاقىرىپ بويىنشا ساۋدا جانە ينتەگراتسيا ءمينيسترى ارمان شاققاليەۆ پەن YTO Express Co. باسقارما ءتوراعاسى يۋ ۆەيتسزيا كەزدەستى.

جيىندا ورتالىق ازياداعى ەڭ ءىرى ەلەكتروندى ساۋدا تاراتۋ ورتالىقتارىنىڭ ءبىرى قازاقستاندا اشىلاتىنى ءمالىم بولدى. بۇل ورتالىق تاۋارلاردى جەدەل وڭدەۋدى جانە ە و، ە ا ە و جانە ورتالىق ازيا ەلدەرىنە جەتكىزىلۋىن قامتاماسىز ەتپەك. سونداي-اق ينتەللەكتۋالدىق IT شەشىمدەردى ەنگىزۋ، لوگيستيكالىق ۇدەرىستەردى تولىق اۆتوماتتاندىرۋ، كەدەندىك سۇيەمەلدەۋ جۇمىستارى رەتتەلمەك.

ۆەدومستۆو دەرەگىنشە، قازاقستانداعى ەلەكتروندىق ساۋدا نارىعى جىل سايىن 20 پايىزعا وسۋدە.

«قىتايدىڭ ەلەكتروندى ساۋدا نارىعى ءوزىنىڭ اۋقىمىمەن تاڭ قالدىرادى، وندا ساتىلىمداردىڭ 70 پايىزدان استامى ونلاين جۇزەگە اسىرىلۋدا. قازاقستان ءوزىنىڭ ءتيىمدى گەوگرافيالىق ورنالاسۋىمەن حالىقارالىق ەلەكتروندى ساۋدانىڭ نەگىزگى ترانزيتتىك ايماعىنا اينالۋعا ۇمتىلادى. قازپوشتامەن بىرلەسكەن قازاقستاندا تاراتۋ ورتالىعىن قۇرۋ جوباسى ترانسشەكارالىق ساۋدانى دامىتۋعا جاڭا سەرپىن بەرەدى»، - دەگەن قازاقستاننىڭ ساۋدا ءمينيسترى.

YTO Express Co. باسقارما ءتوراعاسى يۋ ۆەيتسزيا بۇل جوبانىڭ بۇكىل ءوڭىردى قامتيتىن ورتالىق ازياداعى جالعىز جوبا ەكەنىن اتاپ ءوتتى. كومپانيا ءبىرقاتار ەلدە تاعى 5 تاراتۋ ورتالىعىن سالۋدى جوسپارلاپ وتىر. قورىتىندىسىندا جوبا ەكونوميكالىق بايلانىستاردى نىعايتۋ مەن حالىقارالىق ونلاين ساۋدانى دامىتۋ جولىنداعى ماڭىزدى قادام سانالماق.