ورتالىق ازياعا استىق ەكسپورتى ارتىپ كەلەدى - مارات قارابايەۆ

استانا. KAZINFORM - قىركۇيەكتە تەمىر جول كولىگى ارقىلى 1,53 ميلليون توننا استىق تاسىمالداندى. بۇل تۋرالى ۇكىمەت وتىرىسىندا كولىك ءمينيسترى مارات قارابايەۆ ايتتى.

«كۇز باستالعاننان تەمىر جول كولىگى ارقىلى استىق تاسىمالىنىڭ دەڭگەيى ارتىپ كەلەدى. وتكەن ايدا 1 ميلليون 53 مىڭ توننا استىق تاسىمالداندى. بۇل 2023 -جىلمەن سالىستىرعاندا 24 پايىزعا كوپ. ونىڭ ىشىندە ەكسپورتقا 867 مىڭ توننا، رەسپۋبليكا ىشىندە 186 توننا تاسىمالداندى. ورتالىق ازيا سەكىلدى ءداستۇرلى نارىقتارعا ەكسپورتتاۋ كولەمى 28 پايىزعا ارتتى. يران باعىتى بويىنشا تاسىمال قايتا جاندانىپ، قىركۇيەكتە 140 مىڭ توننا استىق ەكسپورتتالدى. بۇل رەتتە اقتاۋ پورتىنىڭ ينفراقۇرىلىمى قولدانىلدى. قازاق ايىندا جوسپارلى تاسىمال كولەمى 1 ملن توننا استىقتى قۇرايدى. بۇل وتكەن جىلدىڭ سايكەس ۋاقىتىمەن سالىستىرعاندا 26 پايىزعا كوپ»، - دەدى مينيستر.

ونىڭ اتاپ وتۋىنشە، جىل سوڭىنا دەيىن استىق تاسمالى قارقىندى بولماق. اي سايىن 1,2-1,3 ميلليون توننا استىق تاسىمالدانادى.

«ورتالىق ازيا ەلدەرىنە جانە قىتاي مەن باسقا دا نارىقتارعا قاجەتتى ەكسپورتتىق تاسىمالدى تولىق قامتاماسىز ەتۋ ءۇشىن شەكارالىق وتكىزۋ بەكەتتەرىنىڭ قۋاتتىلىعى جەتكىلىكتى. بۇگىنگى تاڭدا 11800 استىق تاسىمالدايتىن ۆاگون جۇمىلدىرىلعان. ونىڭ 6 مىڭ بىرلىگى ەكسپورتتىق قاتىناستا جۇمىس ىستەيدى. وعان قوسا 16 مىڭ جابىق ۆاگون قولدانىلادى. بۇل ۆاگوندار ۇنتاقتالعان ونىمدەردىڭ تاسىمالىن قامتاماسىز ەتۋگە جانە قىتايعا استىق تيەۋگە، ونىڭ ىشىندە «ازىق-تۇلىك كورپوراتسياسى» كەلىسىمشارتتارىن ورىنداۋعا پايدالانىلادى»، - دەدى مارات قارابايەۆ.

اۆتور
اسحات رايقۇل