ورتالىق ازيا-قىتاي: ب ا ق ينتەگراتسياسىنىڭ جاڭا كەزەڭى
استانا. KAZINFORM - استانادا «قىتاي - ورتالىق ازيا» اقپارات اگەنتتىكتەرىنىڭ فورۋمى ءوتتى. ءىس-شارانى «شينحۋا» اقپارات اگەنتتىگى ق ر پرەزيدەنتى تەلەراديوكەشەنىنىڭ قولداۋىمەن ۇيىمداستىرعان.
فورۋم قارساڭىندا ق ر پرەزيدەنتى تەلەراديوكەشەنىنىڭ ديرەكتورى راۋشان قاجىبايەۆا مەن «شينحۋا» اقپاراتتىق اگەنتتىگىنىڭ باس ديرەكتورى فۋ حۋا ەكىجاقتى كەزدەسۋ وتكىزدى.
تاراپتار جان-جاقتى ستراتەگيالىق ارىپتەستىكتى نىعايتۋ، ورتالىق ازيا مەن قىتايدىڭ بۇقارالىق اقپارات قۇرالدارىنىڭ حالىقارالىق اقپارات كەڭىستىگىندەگى ءۇنىن كۇشەيتۋ، ادامزاتتىڭ ورتاق تاعدىرى قاۋىمداستىعىن قۇرۋ پروتسەسىندەگى ءوزارا ءىس-قيمىل ماسەلەلەرىن تالقىلادى.
فورۋمنىڭ اشىلۋىندا ق ر پرەزيدەنتى تەلەراديوكەشەنىنىڭ ديرەكتورى راۋشان قاجىبايەۆا كۇن تارتىبىنە شىعارىلعان ماسەلەلەردىڭ وزەكتىلىگى مەن ماڭىزدىلىعىن اتاپ ءوتتى.
مەدياحولدينگ باسشىسىنىڭ ايتۋىنشا، ورتالىق ازيا مەن قىتايدى تەك گەوگرافياسى مەن ەكونوميكاسى ەمەس، عاسىردان- عاسىرعا جالعاسىپ كەلە جاتقان مادەني قاۋىمداستىق، ورتاق داستۇرلەر مەن بەيبىتشىلىككە دەگەن ۇمتىلىسى بىرىكتىرەدى. جۇزدەگەن جىلدار بويى ۇلى جىبەك جولى ەۋرازيا كەڭستىگىندەگى وراسان زور وزگەرىستەردىڭ كاتاليزاتورى بولدى. ال بۇگىندە بۇل ءرولدى «ءبىر بەلدەۋ - ءبىر جول» جوباسى اتقارىپ وتىر. ونى العاش رەت قىتاي حالىق رەسپۋبليكاسىنىڭ ءتوراعاسى شي جينپيىڭ مىرزا 2013 -جىلى استانادا جاريالاعان.
- ءبىزدىڭ ەلدەر ساۋدا-ەكونوميكا، كولىك-لوگيستيكا سالالارىندا اۋقىمدى جوبالاردى جۇزەگە اسىرىپ جاتىر. الايدا، ءبىر-ءبىرىمىزدى جاقىنىراق تانۋعا مۇمكىندىك بەرەتىن ورتاق اقپاراتتىق جانە مادەني كەڭىستىك قۇرۋ دا سونداي ماڭىزدى، - دەدى راۋشان قاجىبايەۆا، ب ا ق- تىڭ قوعامدىق كوڭىل-كۇيدى قالىپتاستىرۋدا، جاڭا يدەيالارمەن جانە قۇندىلىقتارمەن الماسۋداعى ماڭىزدى رولىنە نازار اۋدارا وتىرىپ.
وسى تۇرعىدا Kazinform قىتايدىڭ الەۋمەتتىك جەلىلەرىندەگى بەلسەندىلىگىن ارتتىرىپ كەلەدى. اگەنتتىكتىڭ Weibo جانە WeChat پلاتفورمالارىنداعى رەسمي اككاۋنتتارى قازاقستان جاڭالىقتارىن جەدەل ءارى ءتيىمدى تاراتۋعا، ونى كەڭ اۋديتورياعا قولجەتىمدى ەتۋگە مۇمكىندىك بەرەدى.
- جاقىندا استانادا وتكەن «ورتالىق ازيا - قىتاي» ەكىنشى سامميتى ءوڭىرىمىزدىڭ ەلدەرى مەن قىتاي اراسىنداعى قاتىناستاردى دامىتۋعا ستراتەگيالىق باعىت بەرىپ وتىر. اقپارات قۇرالدارىنىڭ مىندەتى - وسى باستامالاردى اقپاراتتىق كەڭىستىكتە قولداپ، ىلگەرىلەتۋ. بۇل ءوز كەزەگىندە ەلدەرىمىز اراسىنداعى جان-جاقتى ستراتەگيالىق ارىپتەستىكتى نىعايتۋعا ىقپال ەتەدى، - دەدى راۋشان قاجىبايەۆا.
«شينحۋا» اقپارات اگەنتتىگىنىڭ باس ديرەكتورى فۋ حۋا قىتاي مەن ورتالىق ازيانىڭ بەس مەملەكەتىنىڭ اقپارات قۇرالدارى اراسىنداعى ىنتىماقتاستىق ناتيجەلەرىن جوعارى باعالاپ، بۇل ءوزارا تۇسىنىستىك پەن حالىقتار اراسىنداعى دوستىقتى تەرەڭدەتۋگە ىقپال ەتەتىنىن اتاپ ءوتتى.
- وسى فورۋمداعى مۇمكىندىكتى پايدالانىپ، ىنتىماقتاستىقتى تالقىلاي الامىز، قىتاي مەن ورتالىق ازيا اقپارات اگەنتتىكتەرىنىڭ ءۇنىن بۇكىل الەم ەستۋى ءۇشىن دامۋ باعىتتارىن بىرلەسە جوسپارلاپ، كۇش- جىگەرىمىزدى بىرىكتىرە الامىز. بۇل ورتاق تاعدىر قاۋىمداستىعىن قۇرۋعا اقپارات اگەنتتىكتەرى قوسا الاتىن ۇلەستى ارتتىرادى، - دەدى فۋ حۋا.
ونىڭ ايتۋىنشا، ءوزارا ءىس- قيمىلدى نىعايتۋ ماقساتىندا «شينحۋا» جاھاندىق وڭتۇستىك ەلدەرىنىڭ ب ا ق جانە ساراپتامالىق ورتالىقتارى اراسىنداعى ارىپتەستىك باعدارلاماسىن ازىرلەگەن.
- ءبىز جاھاندىق وڭتۇستىك ەلدەرىنىڭ، سونىڭ ىشىندە ورتالىق ازيا مەملەكەتتەرىنىڭ ب ا ق، ساراپتامالىق ورتالىقتارى، مەملەكەتتىك مەكەمەلەرى، كومپانيالارى مەن جوعارى وقۋ ورىندارىنىڭ ءتۇرلى سالاداعى پراكتيكالىق ىنتىماقتاستىعىن ىلگەرىلەتۋگە بەلسەندى قاتىسادى دەپ ۇمىتتەنەمىز، - دەدى «شينحۋا» اقپارات اگەنتتىگىنىڭ باس ديرەكتورى.
سونىمەن بىرگە، ديالوگ الاڭىندا قىرعىزستاننىڭ «كابار»، تاجىكستاننىڭ «حوۆار»، تۇرىكمەنستاننىڭ «مەديا-تۋركمەن» جانە وزبەكستاننىڭ مەملەكەتتىك اقپارات اگەنتتىكتەرىنىڭ باسشىلارى ءسوز سويلەدى.
تاراپتار ەكىجاقتى جانە كوپجاقتى گۋمانيتارلىق بايلانىستاردى دامىتۋ، بىرلەسكەن جوبالاردى ىلگەرىلەتۋ، كونتەنت الماسۋ، كادر دايارلاۋ، ب ا ق الەۋەتىن نىعايتۋ جانە «ءبىر بەلدەۋ - ءبىر جول» باستاماسى اياسىندا رەسۋرستاردى بىرلەسىپ پايدالانۋ ماسەلەلەرىن تالقىلادى.
فورۋمعا قاتىسۋشىلار جاساندى ينتەللەكت تەحنولوگيالارىنىڭ قارقىندى دامۋى جاعدايىندا كاسىبي قىزمەتتەگى جاڭا تاسىلدەرگە توقتالىپ، ەتيكالىق نورمالار مەن جوعارى كاسىبي ستاندارتتاردى ساقتاۋ قاجەتتىگىن قولدادى.
كەزدەسۋ قورىتىندىسى بويىنشا ق ر پرەزيدەنتى تەلەراديوكەشەنى مەن «شينحۋا» اقپارات اگەنتتىگى اراسىندا ىنتىماقتاستىق تۋرالى مەموراندۋمعا قول قويىلدى. قۇجاتتا جاڭالىق كونتەنتىمەن الماسۋ، بىرلەسكەن ترەنينگتەر مەن سەمينارلار وتكىزۋ، مۋلتيمەديالىق ءوزارا ءىس- قيمىلدىڭ جاڭا فورماتتارىن دامىتۋ، سونداي-اق اقپاراتتى ۇلتتىق جانە حالىقارالىق دەڭگەيدە ىلگەرىلەتۋ كوزدەلگەن.
ايتا كەتەيىك، پرەزيدەنت ورتالىق ازيا-قىتاي اقپارات قۇرالدارىنىڭ فورۋمىنا قۇتتىقتاۋ جولدادى.
اۆتور
ايجان سەرىكجان قىزى