ورتالىق ازيا ايماعى تۇراقتى، ءارى قاۋىپسىز – ە و- نىڭ قازاقستانداعى ەلشىسى

استانا. KAZINFORM - ەۋروپالىق وداقتىڭ قازاقستانداعى ەلشىسى كەستۋتيس يانكاۋسكاس ەجەلگى جىبەك جولى بويىندا ورنالاسقان ورتالىق ازيا ەلدەرى، ونىڭ ىشىندە قازاقستاننىڭ تۋريستىك الەۋەتىنە قاتىستى ويىمەن ءبولىستى.

«ەۋروپا ەلدەرىنىڭ تۇرعىندارى ورتالىق ازيانى قايتا اشۋدا، ويتكەنى مۇندا قىزىقتى ءىس-شارالار وتەدى. مىسالى، الداعى V دۇنيەجۇزىلىك كوشپەندىلەر ويىندارى. ورتالىق ازيا ايماعى تۇراقتى، ءارى قاۋىپسىز، قوناقجاي، مادەنيەتى مەن تابيعاتىندا وزىندىك ەرەكشەلىكتەرى بار. تۋريستىك الەۋەتى ءالى دە كەڭىنەن تانىمال ەمەس، سول ۇشىندە اۋە تاسىمالىن جيىلەتىپ، تۋريستەرگە اقپاراتتى قول جەتىمدى ەتۋ قاجەت. ءبىز ترانسكاسپي كولىك ءدالىزى، ۇلتتىق اۋە قاتىناسى، شاعىن جانە ورتا بيزنەس جوبالارى سياقتى ءبىرقاتار جوباعا ميلليونداعان ەۋرو ينۆەستيتسيا قۇيدىق. ولاردىڭ بارلىعى ءبىر-بىرىمەن بايلانىستى»، - دەدى كەستۋتيس يانكاۋسكاس ب ا ق وكىلدەرىنىڭ ساۋالىنا جاۋاپ بەرە تۇرىپ.

ە و ەلشىسىنىڭ ايتۋىنشا، جوبالاردىڭ باستى ماقساتى - ەۋروپالىق وداق پەن ورتالىق ازيا ەلدەرى اراسىندا بيزنەس، مادەنيەت، تۋريزم سالاسىندا قارىم-قاتىناستى نىعايتۋ جانە ەجەلگى جىبەك جولىن جاڭعىرتۋ.

«مەن جاقىندا تۇركىستانداعى قوجا احمەت ياسساۋي كەسەنەسىنە باردىم. تۇركىستاندا كورۋگە بولاتىن كوپ نارسە بار. مادەني مۇرا ورتالىعى رەتىندە تۇركىستان مەن ونىڭ توڭىرەگىندەگى بارلىق ينفراقۇرىلىم جاقسى دامىعان. ءقازىر قازاقستاننىڭ تۋريزم مينيسترلىگى قولجەتىمدى جانە ساپالى اقپاراتپەن قامتۋ باعىتىندا جۇمىس ىستەپ جاتىر. مەنىڭ ويىمشا، تۋريستەر سانى ارتىپ كەلەدى، سايكەسىنشە ەۋروپا قازاقستان تۋرالى مالىمەتتەر كەڭىنەن تارالادى»، - دەپ تولىقتىردى ول.

بۇعان دەيىن ەۋروپالىق وداقتىڭ قازاقستانداعى ەلشىسى كەستۋتيس يانكاۋسكاس جىبەك جولىن جاڭعىرتۋعا قاتىستى پىكىرىمەن بولىسكەن ەدى.

ايتا كەتەيىك، بۇگىن استانادا ەۋروپالىق وداقتىڭ قارجىلاندىرۋىمەن يۋنەسكونىڭ الماتىداعى ايماقتىق كەڭسەسى 2018-جىلدان بەرى ىسكە اسىرىپ كەلگەن «ورتالىق ازياداعى جىبەك جولى مۇراسىنىڭ دالىزدەرى - ەۋروپالىق مادەني مۇرا جىلىنىڭ حالىقارالىق اسپەكتىلەرى» اتتى اۋقىمدى وڭىرلىك جوباسىنىڭ ناتيجەلەرى جاريالاندى.