پورتۋگاليالىق پەپە ەۋروپا چەمپيوناتىندا ويناعان ەڭ ەگدە فۋتبولشى اتاندى

استانا. KAZINFORM - فۋتبولدان ەۋروپا چەمپيوناتىنا قاتىسىپ جاتقان پورتۋگاليالىق فۋتبولشى پەپە اتالعان دوپ دوداسىنداعى ەڭ ەگدە ويىنشى اتاندى.

ول كەشە، 18-ماۋسىمدا پورتۋگاليا مەن چەحيا كەزدەسۋىندە نەگىزگى قۇرامدا جاسىل الاڭعا شىعىپ، 90 مينۋت بويى وينادى. وسىلايشا ول 41 جاس، 113 كۇن كورسەتكىشىمەن قۇرلىقتىق دودا تاريحىنداعى ەڭ ەگدە فۋتبولشى بولدى. پورتۋگاليالىق قورعاۋشى ۆەنگريانىڭ ايگىلى قاقپاشىسى گابور كيرايدىڭ (40 جاس، 86 كۇن) رەكوردىن جاڭارتتى.

پەپە 1983 -جىلى 26-اقپاندا برازيليادا دۇنيەگە كەلگەن. سپورتتىق مانسابىندا پورتۋگاليانىڭ «ماريتيمۋ»، «پورتۋ»، يسپانيانىڭ «رەال مادريد»، تۇركيانىڭ «بەشيكتاش» كلۋبتارىندا دوپ تەپتى.

ۇلتتىق قۇراما ساپىندا 2007 -جىلدان بەرى 136 ويىن وتكىزىپ، 8 گولدىڭ اۆتورى اتاندى.

ەسكە سالساق، بۇدان بۇرىن تۇركيالىق اردا گيۋلەر رونالدۋدىڭ رەكوردىن جاڭارتتى. ول تۇركيا مەن گرۋزيا كەزدەسۋىندە 65-مينۋتتا گول سوعىپ، تۇساۋكەسەر ويىنىندا گول سوققان ەڭ جاس فۋتبولشى (19 جاس، 114 كۇن) بولدى.

اردا گيۋلەر بۇل گولىنىڭ ارقاسىندا پورتۋگاليا قۇراماسىنىڭ شابۋىلشىسى كريشتيانۋ رونالدۋدىڭ 20 جىل ساقتالعان رەكوردىن بۇزدى.

ايتا كەتەيىك، كريشتيانۋ رونالدۋ 2004 -جىلى ەۋروپا چەمپيوناتىنداعى تۇساۋكەسەر ويىنىندا (19 جاس، 128 كۇن) گرەكيا قۇراماسىنا گول سوققان ەدى.

اۆتور

ءادىلجان ۇمبەت