ورالدى قورعاۋ ءۇشىن ب ق و-عا تاعى 500 اسكەري مەن قۇتقارۋشى بارادى
استانا. قازاقپارات - 21-ءساۋىر كۇنى تاڭەرتەڭ جايىق وزەنىندەگى سۋ دەڭگەيى قاۋىپتى مەجەدەن اسىپ، 8,5 مەتردى قۇرادى. وزەن جايىلماسىندا ورنالاسقان ساياجاي الاپتارى سۋ استىندا قالىپ، جايىق جانە شاعان وزەندەرىنىڭ ماڭىنداعى شاعىن اۋداندارعا سۋ كەلدى.
ورال قالاسىندا سۋ تاسقىنىنا قارسى ءىس-شارالار كۇشەيتىلگەن رەجيمدە ءجۇرىپ جاتىر.
قورعانىس قۇرىلىستارىن نىعايتۋ شارالارىنا وبلىس بويىنشا 10,6 مىڭنان استام ادام جانە قالا بويىنشا 6,4 مىڭ ادام، سونداي-اق قازاقستاننىڭ باسقا وڭىرلەرىنەن تارتىلعان 2 مىڭنان استام تەحنيكا جۇمىلدىرىلعان.
ۆيتسە- پرەمەر قانات بوزىمبايەۆ سۋ تاسقىنىنا قارسى تۇرۋ ءۇشىن ماڭعىستاۋ، اقتوبە وبلىستارىنان، استانا مەن الماتىدان تاعى 500 اسكەري قىزمەتشى مەن قۇتقارۋشىنى ب ق و-عا جىبەرۋدى تاپسىردى.
ت ج م جانە قورعانىس مينيسترلىگى جەلىسى بويىنشا 200 ادام ورالعا كەلىپ، جۇمىسقا كىرىستى.
قانات بوزىمبايەۆ ورالدىڭ پەريمەترىندەگى سۋ تاسقىنىنا قارسى قورعانىس قۇرىلىستارىن تەكسەردى.
سۋ تاسقىنىنىڭ شارىقتاۋ شەگى ءالى الدا دەپ كۇتىلىپ وتىر.
وسىعان بايلانىستى ۆيتسە- پرەمەر تاسقىن قاۋپى بار ايماق وزەندەرىنىڭ بويىنداعى جەر بوگەتتەرىن تاعى بىرنەشە مەترگە كوتەرۋدى تاپسىردى.
ب ق و اۋىلدارىندا جاعداي تۇراقتى جانە باقىلاۋدا.
سۋ تاسقىنى كەزەڭى باستالعالى وڭىردەگى جايىق جانە شاعان وزەندەرىنىڭ بويىندا 136 شاقىرىمنان اساتىن بوگەت سالىندى.
ونىڭ ىشىندە ورال قالاسىندا وسىنداي بوگەت 45 شاقىرىمعا جەتتى.
ەسكە سالا كەتەيىك، بۇدان بۇرىن ورال قالاسىندا جايىقتاعى سۋ دەڭگەيى قاۋىپتى شەكتەن اسىپ كەتكەنىن جازعان بولاتىنبىز.
ورال قالاسى توڭىرەگىندە ساياجايلار سۋعا كەتىپ جاتىر.
ب ق و ت ج دەپارتامەنتى سۋ باسقان اۋماقتاردا قالۋ قاۋىپتى ەكەنىن ەسكەرتتى.
ورال ساياجايلارىنان ادامدار ءماجبۇرلى تۇردە كوشىرىلىپ جاتىر.