ورالدا توپ بولىپ توبەلەسكەندەر ۇستالدى

ورال. KAZINFORM - ورال قالاسىندا تۇنگى كلۋبتاردىڭ بىرىندە جاس جىگىت ەكى ادامدى پىشاقتادى. ب ق و پوليتسيا دەپارتامەنتى باستىعىنىڭ ءبىرىنشى ورىنباسارى، پوليتسيا پولكوۆنيگى بولاتبەك اقشاۋوۆتىڭ ءمالىم ەتكەنىندەي، 3-قاراشا كۇنى تۇنگى ساعات 00.05 شاماسىندا تۇنگى كلۋبقا جاس جىگىت كىرمەكشى بولعان.

الايدا كۇزەتشىلەر ونىڭ ماس كۇيدە ەكەنىن كورىپ جانە ءوزىن دورەكى ۇستاعاندىقتان، كلۋبقا كىرگىزبەگەن. سودان كەيىن اتالعان جىگىت كلۋبقا كەلگەن ءبىر ازامات پەن كۇزەت قىزمەتكەرىنە پىشاق جاراقاتىن كەلتىرگەن. 
«ءبىر توپ كەلۋشىلەر مەن كۇزەتشىلەر جىگىتتى جانار-جاعار ماي ستانساسى ماڭىندا ۇستاپ، پوليتسيا قىزمەتكەرلەرى جەتكەنگە دەيىن سوققىعا جىققان. جىگىتكە قاتىستى دەنساۋلىققا قاساقانا اۋىر زيان كەلتىرۋ جانە بۇزاقىلىق دەرەكتەرى بويىنشا سوتقا دەيىنگى تەرگەۋ باستالدى، ول ۋاقىتشا ۇستاۋ يزولياتورىنا قاماۋعا الىندى. سونداي-اق بۇزاقىلىق دەرەگى بويىنشا مەكەمە كۇزەتشىلەرىنە قاتىستى سوتقا دەيىنگى تەرگەۋ باستالدى. ولاردىڭ ءبىرى ۋاقىتشا ۇستاۋ يزولياتورىنا قامالدى. قازىرگى ۋاقىتتا پوليتسيا وقيعانىڭ بارلىق قاتىسۋشىلارىن انىقتاپ، قولعا ءتۇسىردى. تەرگەۋ امالدارى جۇرگىزىلۋدە»، دەدى ب. اقشاۋوۆ.
الەۋمەتتىك جەلىدە تارالعان بەينەجازبادا VenOil جانار-جاعار ماي قۇيۋ ستانساسى اۋماعىندا ءبىر توپ ادامنىڭ بىرەۋدى دۋبينكامەن ۇرىپ جاتقانى انىق كورىنەدى. تاپانشادان وق اتىلعانى دا ەستىلەدى.

اۆتور
عايساعالي سەيتاق