ورالدا تۇنگى كلۋبقا كەلۋشىلەرگە قول جۇمساعان 17 كۇزەت قىزمەتكەرى ۇستالدى
ورال. KAZINFORM - ورالدا تۇنگى كلۋبتاردىڭ بىرىندە كۇزەت قىزمەتكەرلەرىنىڭ زاڭسىز ارەكەتتەرى انىقتالىپ، جولى كەسىلدى.
ب ق و پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، كۇزەتشىلەر كەلۋشىلەردىڭ قاۋىپسىزدىگىن قامتاماسىز ەتۋدىڭ ورنىنا، كەرىسىنشە قاتىگەزدىك تانىتىپ، كۇش قولدانعان.
ارنايى وپەراتسيا بارىسىندا كۇدىكتى توپ مۇشەلەرى تەك ورالدا عانا ەمەس، سونداي-اق الماتى جانە اقتاۋ قالالارىندا دا ۇستالدى. بارلىعى - باتىس قازاقستان وبلىسىنىڭ تۋمالارى. ولاردىڭ تورتەۋى بۇعان دەيىن دە قىلمىستىق جاۋاپكەرشىلىككە تارتىلعان. جالپى، ىشكى ىستەر ورگاندارىنا 17 ادام جەتكىزىلدى، سونىڭ ىشىندە 8 كۇدىكتى ۋاقىتشا ۇستاۋ يزولياتورىنا قامالدى.
جەدەل ىزدەستىرۋ ءىس-شارالارىن باتىس قازاقستان وبلىسى پوليتسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسى ارنايى بولىمشەلەردىڭ قولداۋىمەن جۇرگىزگەن.
تەرگەۋ بارىسىندا انىقتالعانىنداي، كۇزەتشىلەر كەلۋشىلەرگە جۇيەلى تۇردە جانە نەگىزسىز كۇش قولدانعان، سونىڭ سالدارىنان جابىرلەنۋشىلەرگە ءتۇرلى دەنە جاراقاتتارى، سونىڭ ىشىندە اۋىر زيان كەلتىرىلگەن. كوپ جاعدايدا جابىرلەنۋشىلەر قۇقىق قورعاۋ ورگاندارىنا شاعىمدانۋدان قورقىپ، ءۇنسىز قالعان. وعان سەبەپ - كۇدىكتىلەر تاراپىنان قىسىم مەن قۋدالاۋ ءقاۋپى بولۋى مۇمكىن.
- قازىرگى ۋاقىتتا كۇدىكتىلەرگە قاتىستى ەكى نەمەسە ودان دا كوپ ادامعا قاساقانا اۋىر دەنە جاراقاتىن كەلتىرۋ جانە توپپەن جاسالعان بۇزاقىلىق بويىنشا قر قىلمىستىق كودەكسىنىڭ باپتارىنا سايكەس قىلمىستىق ءىس قوزعالدى. ءتىنتۋ كەزىندە 7 راديوستانتسيا (سونىڭ ىشىندە بىرەۋى - پوليتسيا قىزمەتكەرلەرىنە ارنالعان بايلانىس قۇرالى)، پىشاقتار، بۇرىشتى گاز باللونى، بەيسبول تاياعى، جاقىن شەتەلدەرگە تيەسىلى بولۋى مۇمكىن 10 عا جۋىق كولىكتىڭ نومىرلىك بەلگىسى تاركىلەندى، - دەپ حابارلادى ۆەدومستۆودان.
ەسكە سالا كەتەيىك، بۇدان بۇرىن ب ق و- دا جۇك كولىگى پويىزبەن سوقتىعىسىپ، جۇرگىزۋشى مەرت بولعانىن جازعان ەدىك.