ورالدا قۇمار ويىن ويناعان 16 شەنەۋنىك جۇمىستان شىعارىلدى
ورال. KAZINFORM - ورال قالاسى اكىمدىگىنىڭ، مەملەكەتتىك كىرىستەر جانە قالالىق پوليتسيا باسقارمالارىنىڭ جەكەلەگەن لاۋازىمدى تۇلعالارى بۋكمەكەرلىك كەڭسەلەر ارقىلى قۇمار ويىندارعا قاتىسقان.
2024 -جىلعى 15-ناۋرىزدا اتىراۋ قالاسىندا وتكەن ۇلتتىق قۇرىلتاي وتىرىسىندا مەملەكەت باسشىسى جاريالاعان تاپسىرماعا سايكەس، سىبايلاس جەمقورلىققا قارسى ءىس-قيمىل تۋرالى زاڭناماعا وزگەرىستەر ەنگىزىلدى.
2024 -جىلعى 9 قىركۇيەكتەن باستاپ، مەملەكەتتىك قىزمەتشىلەردىڭ، ونىڭ ىشىندە ونلاين فورماتتا، قۇمار ويىندارى مەن ءباس تىگۋگە قاتىسۋى سىبايلاس جەمقورلىققا قارسى شەكتەۋلەردى بۇزۋ بولىپ تانىلادى.
ورال قالاسىنىڭ پروكۋراتۋراسى وسى نورمالاردىڭ ساقتالۋىنا تالداۋ جۇرگىزدى. انىقتالعانداي، ورال قالاسى اكىمدىگىنىڭ، مەملەكەتتىك كىرىستەر جانە قالالىق پوليتسيا باسقارمالارىنىڭ جەكەلەگەن لاۋازىمدى تۇلعالارى بۋكمەكەرلىك كەڭسەلەر ارقىلى قۇمار ويىندارعا قاتىسقان.
اتالعان فاكتىلەر بويىنشا ورال قالاسىنىڭ پروكۋراتۋراسى ورال قالاسى اكىمدىگىنە، باتىس قازاقستان وبلىسىنىڭ مەملەكەتتىك كىرىستەر باسقارماسىنا جانە پوليتسيا دەپارتامەنتىنە قاداعالاۋ اكتىلەرى ەنگىزدى.
- ولاردى قاراۋ قورىتىندىسى بويىنشا 24 لاۋازىمدى تۇلعا تارتىپتىك جاۋاپكەرشىلىككە تارتىلىپ، ونىڭ ىشىندە 16 سى اتقارىپ وتىرعان لاۋازىمدارىنان بوساتىلدى. «OLIMPBET» ج ش س-نىڭ مالىمەتتەرىنە سايكەس ورال قالاسى اكىمدىگىنىڭ ءبىر قىزمەتكەرى 2021 -جىلعى 5-ماۋسىم مەن 2025 -جىلعى 22-قاڭتار ارالىعىندا ءوزىنىڭ جەكە شوتىنا 34047142 تەڭگەدەن استام قاراجات سالعان. ونىڭ ىشىندە، زاڭناماداعى وزگەرىستەر كۇشىنە ەنگەننەن كەيىن 1741000 تەڭگە سالىپ، ونىڭ 971000 تەڭگەسىن ۇتىلعان. وسى ءمان-جايلارعا بايلانىستى اتالعان قىزمەتكەر لاۋازىمىنان بوساتىلدى، - دەلىنگەن باتىس قازاقستان وبلىسىنىڭ پروكۋراتۋراسى تاراتقان حابارلامادا.
ورال قالاسىنىڭ پروكۋراتۋراسى سىبايلاس جەمقورلىققا قارسى زاڭنامانىڭ، ونىڭ ىشىندە سىبايلاس جەمقورلىققا قارسى شەكتەۋلەردىڭ ساقتالۋىنا جۇيەلى تۇردە قاداعالاۋ جۇرگىزۋدى جالعاستىرادى.
ايتا كەتەلىك Sax Invest ۇيىمداستىرۋشىسى سالىمشىلاردىڭ قاراجاتىن كازينودا ۇتىلىپ، ساياحاتتارعا جۇمساعان.