ورالدا كافەدەگى جارىلىستان ەكى ادام قازا تاپتى

ورالدا كافەدەگى جارىلىس سالدارىنان ەكى ادام قازا تاپتى، دەپ حابارلايدى Kazinform.

ورال قالاسىندا كافەدە جارىلىس بولىپ، ءورت شىقتى. ب ق و ت ج دەپارتامەنتىنىڭ باسپا ءسوز قىزمەتىنەن ءمالىم ەتكەندەي، 4-قاڭتار كۇنى ساعات 02.07-دە سىرىم دات ۇلى كوشەسى 52-مەكەنجايىندا ءورت شىققانى جونىندە حابار تۇسكەن.

وقيعا ورنىنا ساعات 02.17-دە جەتكەن ءورت سوندىرۋشىلەر ەكى قاباتتى RIZYQ ءدامحاناسىنىڭ عيماراتىندا الدىن الا بولجام بويىنشا گاز- اۋا قوسپاسىنىڭ جارىلىسى بولعانىن حابارلادى.

فوتو: ب ق و توتەنشە جاعدايلار دەپارتامەنتى

سالدارىنان عيماراتتىڭ 110 شارشى مەتر بولىگى قيراپ، 25 شارشى مەتر اۋماقتى ءورت شارپىعان.

«ءتىلسىز جاۋ» ساعات 02.40-تا اۋىزدىقتالدى. وقيعا ورنىنان ءورت سوندىرۋشىلەر مەن جەكە قۇرامنان 39 ادام، 13 تەحنيكا، جەدەل جاردەم بريگاداسى (18 ادام، 6 تەحنيكا) پوليتسيا دەپارتامەنتى (28 ادام، 7 تەحنيكا) قىزمەتكەرلەرى جۇمىس جاسادى. قازىرگى ۋاقىتتا ب ق و تجد جانە وبلىس اكىمدىگىنىڭ كۇشتەرىمەن قيراعان ۇيىندىلەردى تازارتۋ بويىنشا جۇمىستار جۇرگىزىلۋدە. زارداپ شەككەندەرگە شۇعىل پسيحولوگيالىق كومەك كورسەتۋ ءۇشىن ب ق و ت ج د شتابىندا 87112554088 ءنومىرى بويىنشا جەدەل جەلى جۇمىسى ۇيىمداستىرىلدى» دەپ حابارلادى ۆەدومستۆودان.

فوتو: ب ق و توتەنشە جاعدايلار دەپارتامەنتى

ورالدا كافەدەگى جارىلىس سالدارىنان ەكى ادام قازا تاپتى.  ب ق و ت ج دەپارتامەنتىنىڭ باسپا ءسوز قىزمەتىنەن تۇسكەن مالىمەتكە قاراعاندا، قيراعان عيمارات استىنان 6 ادام تابىلىپ، بەسەۋى مەديتسينالىق مەكەمەلەرگە جەتكىزىلدى.

«بىرەۋى اۋرۋحاناعا جاتۋدان باس تارتتى. وقيعا ورنىندا ەكى ادام كوز جۇمدى. ادامداردىڭ كىم ەكەنى انىقتالۋدا. ۇيىندىلەردىڭ استىندا ءالى دە ادامدار بولۋى مۇمكىن. اپاتتىق-قۇتقارۋ جۇمىستارى جالعاسۋدا» دەپ حابارلادى ۆەدومستۆودان.

ەسكە سالا كەتەيىك، بۇدان بۇرىن ورالدا كافەدە جارىلىس بولىپ، سوڭى ورتكە ۇلاسقانىن جازعان بولاتىنبىز.

اۆتور
عايساعالي سەيتاق