ورالدا ءوز ۇيىندە قاراسورا وسىرگەن ەر ادام ءۇش جىلعا سوتتالدى

ورال. KAZINFORM - ورال قالالىق سوتىندا د. دەگەن ەر ادامعا قاتىستى قىلمىستىق ىسكە نۇكتە قويىلدى.

ب ق و سوتىنىڭ باسپا ءسوز قىزمەتىنەن ءمالىم ەتكەنىندەي، وعان ق ر ق ك 296-بابى 2-بولىگى، 300-بابى 2-بولىگى 3-تارماعىنا (ەسىرتكى زاتتارىن زاڭسىز ساتىپ الۋ، وتكىزۋ ماقساتىنسىز ساقتاۋ، سونداي- اق ءىرى مولشەردە، قۇرامىندا ەسىرتكى زاتتارى بار وسىرۋگە تىيىم سالىنعان وسىمدىكتەردى ءوسىرۋ) سايكەس ايىپ تاعىلدى.

سوتتا انىقتالعانىنداي، ەر ادام وتكەن جىلدىڭ قازان- قاراشا ايىندا ماريحۋانا الۋ ءۇشىن قاراسورا تۇقىمىن ساتىپ العان. وسى ماقساتتا ول ءوز پاتەرىنىڭ جاتىن بولمەسىن پايدالانىپ، ارنايى ءۇي شكافىن جابدىقتادى. وسىرۋگە تىيىم سالىنعان، قۇرامىندا ەسىرتكى زاتتارى بار، ءتيىستى رۇقساتى جوق ەگۋ جانە ءوسىرۋ ماقساتىندا ول ساتىپ العان ەسىرتكى زاتىن باقشا كاستريۋلىنە 1 دانا مولشەرىندە وتىرعىزدى.

سودان كەيىن وسىمدىكتىڭ جاپىراقتارى مەن گۇل شوعىرلارىنىڭ ءبىر بولىگىن ۇنتاقتاپ، كەپتىرىپ، ەسىرتكىگە ماس كۇيىندە 3 تاماق فولگاسىنا جانە 1 قاعاز ورامعا وراپ، ءوزى پايدالانۋ ءۇشىن ساقتاعان.

- سوتتالۋشى كىناسىن ءىشىنارا مويىندادى. سوت ونى كىنالى دەپ تانىپ، 3 جىلعا باس بوستاندىعىنان ايىرۋ جازاسىن قاۋىپسىزدىگى ورتاشا قىلمىستىق-اتقارۋ جۇيەسى مەكەمەسىندە وتەۋگە ۇكىم كەستى. ۇكىم زاڭدى كۇشىنە ەنگەن جوق، - دەپ حابارلادى ۆەدومستۆودان.