ورالدا اۆتوبۋستاعى جاپپاي توبەلەسكە بايلانىستى قىلمىستىق ءىس قوزعالدى
ورال. KAZINFORM - ورالدا ادامداردىڭ اۆتوبۋستا توبەلەسكەنى تۋرالى الەۋمەتتىك جەلىدە اقپارات تارادى.
تۇرعىنداردىڭ سوزىنە قاراعاندا، MyFest فەستيۆالىنە قاتىسۋشىلار كورەرمەندەردى تاسۋ ءۇشىن شىعارىلعان اۆتوبۋستىڭ ىشىندەگى توبەلەسكە كۋا بولعان.
الدىمەن ەر ادام مەن ايەل جانجال شىعارعان. جانجال بارىسىندا ولاردىڭ بىرەۋى سالونداعى جىگىتكە قاتىستى بۇرىش باللونىن قولدانعان. سالدارىنان جابىرلەنۋشى ەكى كوزىنەن كۇيىك جاراقاتىن العان.
بۇدان كەيىن باسقا جولاۋشىلار اراعا كيلىگىپ، ول جاپپاي توبەلەسكە ۇلاسقان. جولاۋشىلاردىڭ كەيبىرى وسى كەزدە ءان سالىپ وتىرعان.
ب ق و پوليتسيا دەپارتامەنتىنىڭ باسپا ءسوز قىزمەتىنەن تۇسكەن مالىمەتكە قاراعاندا، اتالعان وقيعاعا قاتىستى قىلمىستىق ءىس قوزعالدى.
جانجالعا قاتىسقانداردىڭ بارلىعى انىقتالدى. ولاردىڭ بىرەۋى ۋاقىتشا ۇستاۋ يزولياتورىنا قامالدى.
- قازىرگى كەزدە وقيعانىڭ تولىق ءمان-جايىن انىقتاۋ ماقساتىندا قاجەتتى تەرگەۋ امالدارى جۇرگىزىلۋدە. تەرگەۋ قورىتىندىسىنا سايكەس كىنالىلەر جاۋاپقا تارتىلاتىن بولادى، - دەپ حابارلادى ۆەدومستۆودان.
اۆتور
عايساعالي سەيتاق