ورالدا اسكەرگە بارۋدان قاشقان ءتورت جىگىتتىڭ ءبىرى اۋىر حالدە جاتىر
ورال. KAZINFORM - ورالدا اسكەرگە شاقىرىلعان ءتورت جىگىت وبلىستىق جيناقتاۋ پۋنكتىنەن قاشقان.
ب ق و قورعانىس ىستەرى جونىندەگى دەپارتامەنت باستىعىنىڭ ورىنباسارى البەرت بەكمۇحانوۆتىڭ ءمالىم ەتكەنىندەي، وقيعا 1-جەلتوقسانعا قاراعان ءتۇنى بولعان. ونىڭ سوزىنە قاراعاندا، 30-قاراشا كۇنى ءتورت اسكەرگە شاقىرىلۋشىنى پوليتسيا قىزمەتكەرلەرى الىپ كەلگەن.
- تۇنگى ساعات 02.00-دە ءۇشىنشى قاباتتا تەرەزەگە بيىل قوندىرىلعان تەمىر توردى سىندىرعان. توعىز ادەيالدى، سونىڭ ىشىندە ۇشەۋىن جىرتىپ ءبىر-بىرىنە بايلاپ، ءۇشىنشى قاباتتىڭ تەرەزەسىنەن سەكىرگەن. سول كەزدە ولاردىڭ بىرەۋى اۋىر جاراقات العان. جەدەل جاردەم شاقىرىلىپ، ەمدەۋ مەكەمەسىنە جەتكىزىلدى. دەپارتامەنت جانە مەديتسينالىق قىزمەت باستىعى بارىپ، ءحالىن ءبىلدى، قازىر جاعدايى وتە ناشار، - دەيدى ا. بەكمۇحانوۆ.
ونىڭ ايتۋىنشا، ق ر ق ك 387-بابىنا (اسكەري قىزمەتتەن جالتارۋ) سايكەس قىلمىستىق ءىس قوزعالىپ، اباي پوليتسيا بولىمىنە قولداۋحات جىبەرىلگەن.
اتالعان باپ بويىنشا ايىپتى دەپ تانىلعان ادام ءبىر مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە ءتورت ءجۇز ساعاتقا دەيىنگى مەرزىمگە قوعامدىق جۇمىستارعا تارتۋعا نە ءبىر جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالانادى.
ەگەر اسكەرگە شاقىرىلۋشى تەرگەپ-تەكسەرۋ ورگانى ىستى سوتقا بەرگەنگە دەيىن اسكەرگە شاقىرۋ پۋنكتىنە ءوز ەركىمەن كەلسە، ول قىلمىستىق جاۋاپتىلىقتان بوساتىلادى. وسىنى اعايىن- تۋمالارى تۇسىندىرگەن بولار، قاشقان جاستاردىڭ ۇشەۋى كەلەسى كۇنى شاقىرۋ ۋچاسكەسىنە قايتىپ كەلگەن.
- اۋرۋحانادا جاتقان جىگىت 2023 -جىلى ديپلومىن العان. اسكەري قىزمەتىن وتەۋدى كەيىنگە قالدىرۋعا جانە بوساتۋعا دا نەگىز جوق. وعان قاتىستى ىزدەستىرۋ جۇمىستارى جۇرگىزىلگەن. شاقىرۋ قاعازى قىركۇيەك جانە قاراشا ايىندا قولىنا بەرىلگەن. سونىمەن قاتار كوكتەمدە ەكى رەت جانە قازاندا 1414 ءنومىرى ارقىلى س م س حابارلامانى ءوزى العان. «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭنىڭ 30-بابىندا «شاقىرۋ قاعازىن ازاماتتىڭ جەكە وزىنە تاپسىرۋ مۇمكىن بولماعان جاعدايدا، ونىڭ كەلۋىن قامتاماسىز ەتۋ تيىستى ىشكى ىستەر ورگانىنا جۇكتەلەدى» دەپ كورسەتىلگەن. قازىرگى تاڭدا ق ر ق ك 387-بابىنا سايكەس تەرگەۋ امالدارىمەن قاتار وسى وقيعا بويىنشا قىزمەتتىك تەكسەرىس جۇرگىزىلۋدە. كەزەكشى بولعان قىزمەتكەرگە قاتىستى تەكسەرىس قورىتىندىسى بويىنشا ءتيىستى شارا قولدانىلاتىن بولادى، - دەيدى ا. بەكمۇحانوۆ.
اۋرۋحانادا اۋىر حالدە جاتقان 19 جاستاعى مەيرامبەك سەيفوللايەۆتىڭ اعاسى نۇرحات ابىلعازيەۆتىڭ ايتۋىنشا، ءىنىسىنىڭ دوستارىنا ەرىپ قاشقاندىعىن جەتكىزدى.
- ءىنىمدى ۇيدەن ءماجبۇرلى تۇردە الىپ كەتكەن، ول مورالدىق-پسيحولوگيالىق جاعىنان دايىن ەمەس ەدى. ەندى ونىڭ وسىنداي كۇيگە ۇشىراعانى جانىمىزعا باتادى. قازىر وبلىستىق اۋرۋحانادا جاتقان ءىنىمنىڭ جاعدايى وتە قيىن. مۇگەدەك بولىپ قالۋ قاۋپى بار. ءۇشىنشى قاباتتان قۇلاعان كەزدە ومىرتقاسى سىنعان، جۇلىنىنا زاقىم كەلگەن. كىشى جانە ۇلكەن دارەتكە وتىرۋى قيىنداپ كەتكەن. وقيعا بولعان ۋاقىتتا كەزەكشى ورنىندا وتىرماعان. سودان كەيىن تەرەزەدەگى تەمىر تور وسال بولعان. اسكەرگە جاستاردى كۇشتەپ اكەتىپ جاتقان سوڭ دۇرىستاپ بەكىتۋ قاجەت ەدى. سوسىن جەدەل جاردەمدى بەلىن قايىرىپ الدى دەپ شاقىرعان. ءۇشىنشى قاباتتان سەكىردى دەگەندە، جەدەل جاردەم تەز كەلەتىن ەدى. ولار كەلگەنشە، 1-1,5 ساعاتتاي ۋاقىت وتكەن. قىسقاسى، اسكەري كازارما قىزمەتكەرلەرىنىڭ ءوز جۇمىسىنا سالعىرت قاراعانىنا نارازىمىن. تاعى ءبىر ايتا كەتەتىن جايت، قاشقانداردىڭ ءبىرى بەكسۇلتان اناسىنا حابارلاسىپ، اسكەردەن الىپ قالۋىن وتىنگەن. ايتپەسە «قاشامىز» دەگەن. بەكسۇلتاننىڭ اناسى ورالباي ەسىمدى اسكەري قىزمەتشىگە حابارلاسىپ، بالالاردىڭ قاشقىسى كەلىپ وتىرعانىن ەسكەرتكەن، - دەيدى ن. ابىلعازيەۆ.
مەيرامبەكپەن بىرگە قاشقان ءالي بەيبىتتىڭ مالىمدەۋىنشە، ول اسكەرگە شاقىرۋ پۋنكتىنە ءوز ەركىمەن بارعان.
- 30-قاراشا، سەنبى كۇنى ءتۇس مەزگىلىندە بەكسۇلتان قۇبايەۆ دەگەن دوس بالامدى ۇيىندە ۇيىقتاپ جاتقان جەرىنەن پوليتسيا قىزمەتكەرلەرى الىپ كەتكەن. ساعات بەستەردە ءبىزدىڭ ۇيگە دە كەلدى. اكەم دۇيسەنبى كۇنى اپارامىن دەدى. ءبىراق بەكسۇلتان مەن مەيرامبەك سوندا دەپ ەستىگەننەن كەيىن ولاردان قالعىم كەلمەي، مەن دە باردىم. كەشكە بۇرىن تانىمايتىن ءبىر جىگىت كەلىپ، اكەمدە ءبارى، اسكەري كوميسسارياتتا تانىسى، اقشا دا بار، بارلىعىن شەشىپ بەرەمىن دەپ، ءبىزدى ۇگىتتەي باستادى. ءسويتىپ تۇنگى ەكىدە الدىمەن سول ءتۇستى. سوسىن بەكسۇلتاننان كەيىن كەزەك ماعان كەلدى. ءبىراق ءبىرىنشى قاباتقا جاقىنداعاندا ادەيالى ءۇزىلىپ كەتتى. مۇنىڭ ءۇزىلىپ كەتكەنىن جانە ءبىزدىڭ ەسكەرتىپ ايتقانىمىزدى ەستىمەگەن مەيرامبەك جەرگە قۇلادى. ول جەدەل جاردەم شاقىرۋىمىزدى سۇراپ، بىزگە كەتە بەرىڭدەر دەدى. قاقپادان سەكىرگەن كەزدە قولىمدى سىندىرىپ الدىم، - دەيدى ءا. بەيبىت.
ب ق و پوليتسيا دەپارتامەنتىنىڭ باسپا ءسوز قىزمەتى اتالعان وقيعا بويىنشا اباي پوليتسيا بولىمىمەن سوتقا دەيىنگى تەرگەۋ باستالعانىن حابارلادى.
- قازىرگى كەزدە تەرگەۋ امالدارى جۇرگىزىلۋدە. باسقا اقپارات ق ر قىلمىستىق ءىس جۇرگىزۋ كودەكسىنىڭ 201-بابىنا سايكەس جاريالانۋعا جاتپايدى، - دەپ ناقتىلادى ب ق و پوليتسيا دەپارتامەنتىنىڭ باسپا ءسوز قىزمەتى.
اۆتور
عايساعالي سەيتاق