ورال تۇرعىنى اناسىنىڭ ءولىمى ءۇشىن اۋرۋحانادان 2 ميلليون تەڭگە ءوندىردى
ورال. KAZINFORM - ورال قالاسىنىڭ تۇرعىنى اناسىنىڭ ءولىمى ءۇشىن اۋرۋحانادان مورالدىق زالال رەتىندە 2 ميلليون تەڭگە ءوندىرىپ الدى.
ق ر جوعارعى سوتىنان الىنعان مالىمەتكە قاراعاندا، 2019 -جىلى جەدەل جاردەم بريگاداسى دەنە قىزۋى كوتەرىلگەن 76 جاستاعى ايەلدى جالپى السىزدىكپەن ورال قالالىق اۋرۋحاناسىنا جەتكىزگەن.
دارىگەرلەر سوزىلمالى برونحيت پەن پنيەۆمونيا دەگەن دياگنوز قويىپ، تەراپيا بولىمىنە جاتقىزعان. ءبىراق ەم ناتيجە بەرمەي، ناۋقاستىڭ جاعدايى اۋىرلاعان.
كومپيۋتەرلىك توموگرافيا پليەۆريت دەگەن كۇدىكتى كورسەتكەن.
ءتورت اپتادان كەيىن ناۋقاستىڭ جاعدايى ناشارلاۋىنا بايلانىستى وبلىستىق اۋرۋحاناعا جەتكىزىلىپ، سول جەردە قايتىس بولعان.
جوعارعى سوت دەرەكتەرىنە قاراعاندا، قايتىس بولعان ايەلدىڭ ۇلى دەنساۋلىق ساقتاۋ باسقارماسىنا دارىگەرلەردىڭ سالعىرتتىعى مەن ءتيىستى ەم قابىلداماعانى تۋرالى شاعىممەن جۇگىنگەن، تەكسەرۋ بارىسىندا اۋرۋحانا تاراپىنان زاڭ بۇزۋشىلىقتار انىقتالعان. تەكسەرۋ ماتەريالدارى باتىس قازاقستان وبلىستىق پوليتسيا دەپارتامەنتىنە جولدانىپ، قىلمىستىق ءىس قوزعالىپ، قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى بىرنەشە رەت توقتاتىلىپ، پروكۋراتۋرا كۇشىن جويعان.
«دەنساۋلىق ساقتاۋ باسقارماسى قالالىق اۋرۋحانانىڭ قارسىلىعىن قابىلداماعاندىقتان، مارقۇمنىڭ ۇلى اۋرۋحانادان مورالدىق شىعىندى وتەۋ تۋرالى ورال قالاسىنىڭ № 2-سوتىنا شاعىم تۇسىرگەن. ول انانىڭ ولىمىنە ساپاسىز مەديتسينالىق كومەك پەن قالالىق اۋرۋحانا دارىگەرلەرىنىڭ ارەكەتسىزدىگى سەبەپ بولعانىن اتاپ وتكەن. سونداي-اق تالاپ قويۋشىنىڭ اناسى ەمدەلىپ جاتقان اۋرۋحانانىڭ تەراپيا بولىمىندە جالپى پراكتيكالىق دارىگەردىڭ كۋالىگى بار مامان جۇمىس ىستەگەنى، وعان قۇقىعى جوق ەكەنى تۋرالى فاكت بەلگىلى بولدى. ساراپشى ناۋقاسقا ونىڭ جاسى مەن وندا بار سوزىلمالى اۋرۋلارى، سونىڭ ىشىندە بۇيرەكتىڭ جەدەل زاقىمدانۋىن تۋدىرعان انتيبيوتيكتەر ەسكەرىلمەي، ءدارى- دارمەك تاعايىندالعانىن جەتكىزدى. ءتيىستى باكتەرياعا قارسى پرەپاراتتار مەن گەمودياليزدى ەنگىزۋ ناۋقاستىڭ ءومىرىن ۇزارتۋى مۇمكىن ەدى. سوت مەديتسينالىق قۇجاتتاردى، ساراپشىلىق قورىتىندىلاردى جانە تەكسەرۋ اكتىسىن ەسكەرە وتىرىپ، دەر كەزىندە قايتالاما سىناقتار وتكىزبەۋ، ناۋقاستىڭ جاعدايىن دۇرىس باعالاماۋ، ەمدەۋدى كەش تۇزەتۋ، نەفرولوگتىڭ كەڭەسىنىڭ ۋاقىتىندا بولماۋى مەن كونسيليۋمنىڭ كەش جۇرگىزىلۋى اۋرۋدىڭ ناتيجەسىنە اسەر ەتكەنىن جانە ولىمگە اكەلىپ سوققانىن انىقتادى. وسى ايتىلعانداردىڭ نەگىزىندە تالاپ قويۋ ءىشىنارا قاناعاتتاندىرىلىپ، تالاپ قويۋشىنىڭ پايداسىنا اۋرۋحانادان 2 ميلليون تەڭگە مورالدىق شىعىن ءوندىرىلدى. شەشىم زاڭدى كۇشىنە ەنگەن جوق»، - دەپ حابارلادى ۆەدومستۆودان.