ورال اكىمدىگىنىڭ شەنەۋنىگى مەملەكەتتىك تۇرعىن ءۇي قورىنان ايەلىنە پاتەر بەرگىزگەن
ورال. KAZINFORM - ورال قالاسى اكىمى اپپاراتى ءبىرىڭعاي مەملەكەتتىك- قۇقىقتىق ءبولىمىنىڭ باسشىسى قىزمەتىن اتقاراتىن ءاليحان مىڭجاساروۆتىڭ قىزمەت بابىن پايدالانىپ، نەكەدە تۇراتىن ايەلى الميرا قاراسايەۆاعا پاتەر الىپ بەرگەنى بەلگىلى بولدى.
ب ق و اكىمىنىڭ باسپا ءسوز قىزمەتىنەن ءمالىم ەتكەندەي، بۇل زاڭبۇزۋشىلىقتى ءوڭىر باسشىسى قۇرعان جۇمىس توبى قىزمەتتىك تەكسەرۋ بارىسىندا بيىلعى 28-ماۋسىمدا انىقتاعان.
«جۇمىس توبىنىڭ قورىتىندىسى لاۋازىمدى قىزمەتكەردىڭ ءىس-ارەكەتىنە ءتيىستى قۇقىقتىق باعا بەرۋ ءۇشىن ورال قالاسى پروكۋراتۋراسىنا جولداندى. سونىمەن قاتار قازىرگى كەزدە وبلىس اكىمىنىڭ تاپسىرماسىنا سايكەس ورال قالاسى اكىمدىگى مەملەكەتتىك تۇرعىن ءۇي قورىنان پاتەر بەرۋدىڭ زاڭدىلىعىن تەكسەرۋ ءۇشىن وسىنداي دەرەكتەردى انىقتاۋ جانە وعان جول بەرمەۋ ماقساتىندا جۇمىس توبىن قۇردى»، - دەپ حابارلادى ۆەدومستۆودان.
ايتا كەتەيىك، سىبايلاس جەمقورلىققا قارسى ءىس-قيمىل تۋرالى زاڭنىڭ 15-بابىنا سايكەس جاۋاپتى مەملەكەتتىك لاۋازىمدى اتقاراتىن ادامدارعا، مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن ادامدارعا جانە سوعان تەڭەستىرىلگەن ادامدارعا، لاۋازىمدى ادامدارعا، ەگەر مۇددەلەر قاقتىعىسى ورىن العان بولسا، لاۋازىمدىق مىندەتتەرىن جۇزەگە اسىرۋعا تىيىم سالىنادى.
اۆتور
عايساعالي سەيتاق