وقىرماندىق مادەنيەتتى ناسيحاتتاپ جۇرگەن نازىم ساپاروۆا Jibek Joly تەلەارناسىنداعى «بۇگىن. LIVE» باعدارداماسىندا ءوز تاجىريبەسىمەن ءبولىستى.
ونىڭ كىتاپقا دەگەن ىقىلاسى بالا كەزىنەن قالىپتاسقان. قازاق ءتىلى مەن ادەبيەتى ءپانىنىڭ مۇعالىمى بولعان اناسى ءۇشىنشى سىنىپتا وقىپ جۇرگەندە ونى كىتاپحاناعا ەرتىپ اپارعان. العاشقى وقىعان شىعارمالارىنىڭ قاتارىندا ورالحان بوكەيدىڭ «اتاۋ كەرە» پوۆەسى مەن مۇحتار اۋەزوۆتىڭ «اباي جولى» رومان-ەپوپەياسى بار. كەيىن ۋنيۆەرسيتەت قابىرعاسىندا شەتەل ادەبيەتىنە قىزىعۋشىلىعى ارتىپ، كىتاپ وقۋ كۇندەلىكتى داعدىسىنا اينالعان.
- كىتاپ وقۋ مەن ءۇشىن بەت جۋۋ، ءتىس تازالاۋ سەكىلدى كۇندەلىكتى ادەتكە اينالدى. كۇنىنە كەمىندە 15 مينۋت، مۇمكىندىك بولسا ءبىر جارىم ساعاتتاي كىتاپ وقيمىن. بۇل مەنىڭ كوڭىل كۇيىمدى رەتتەپ، جانىمدى تىنىشتاندىراتىن قۇرالداردىڭ ءبىرى، - دەيدى ول.
كىتاپتىڭ نازىمنىڭ جەكە ومىرىندە دە ورنى ەرەكشە. جولداسىمەن دە وسى ورتادا تانىسقان. جۇكتىلىك كەزىندە دە كوركەم ادەبيەتتى جيى وقىپ، كىتاپتان جان تىنىشتىعىن تاپقان. بۇگىندە بۇل ادەت وتباسىلىق داستۇرگە ۇلاستى. ەرلى-زايىپتى ۇلدارىنىڭ بويىنا دا كىتاپقا دەگەن سۇيىسپەنشىلىكتى سىڭىرۋگە تىرىسادى.
ءۇش جاستاعى ءالىمحان ءوسىپ كەلە جاتقان ءۇيدىڭ قوناق بولمەسى كىتاپ سورەلەرىنە تولى. اتا-اناسى بالاسىنا كىتاپتى دايىن تاڭداپ بەرمەيدى. كەرىسىنشە كىتاپ دۇكەنىنە بىرگە بارىپ، وزىنە ۇناعان ادەبيەتتى تاڭداۋىنا مۇمكىندىك جاسايدى. قازىر بالانىڭ دينوزاۆرلارعا قىزىعۋشىلىعى باسىم بولعاندىقتان، وسى تاقىرىپتاعى كىتاپتار مەن ويىنشىقتاردى بىرگە ىزدەيدى.
- ءبىز بالامىزعا تەلەفون بەرمەۋگە تىرىسامىز. مۇمكىندىگىنشە كۇنىنە 15 مينۋتتاي عانا قازاق تىلىندەگى ەسكى مۋلتفيلمدەردى كورسەتەمىز. ال ۇيىقتار الدىندا ەرتەگى وقۋ - وتباسىمىزداعى ادەت. كەيدە كىتاپتى ءوزىم وقىپ بەرسەم، كەيدە بالام سۋرەتتەرىنە قاراپ، كەيىپكەرلەرگە ات قويىپ، وقيعانى ءوزى قۇراستىرادى. وسىلايشا قيالى دامىپ، ويىن جەتكىزۋگە ۇيرەنىپ كەلەدى، - دەيدى نازىم ساپاروۆا.
ونىڭ ايتۋىنشا، بالانى كىتاپقا باۋلۋدا اتا-انانىڭ ۇلگىسى شەشۋشى ءرول اتقارادى. ۇلكەندەردىڭ قولىنان كىتاپ كورگەن بالا دا سوعان قىزىعادى. سوندىقتان بالامەن بىرگە كىتاپ دۇكەندەرى مەن كىتاپحانالارعا بارۋ، تەاتر قويىلىمدارىن تاماشالاۋ، وقىعان شىعارمالارىن تالقىلاۋ ماڭىزدى. مۇنداي ورتا بالانىڭ ادەبي كەيىپكەرلەردى كوز الدىنا ەلەستەتىپ، وزدىگىنەن اڭگىمە قۇراۋىنا ىقپال ەتەدى.
مامان بالاعا كىتاپ تاڭداعاندا ونىڭ جاس ەرەكشەلىگى مەن قىزىعۋشىلىعىن ەسكەرۋگە كەڭەس بەرەدى. ءسابي كەزىنەن باستاپ-اق كىتاپپەن تانىستىرۋعا بولادى. العاشقى كەزەڭدە اق-قارا ءتۇستى سۋرەتتەرى بار كىتاپتاردى، كەيىن دىبىس شىعاراتىن، سيپاپ سەزۋگە ارنالعان تاكتيلدى باسىلىمداردى ۇسىنۋعا بولادى. بالا ەسەيگەن سايىن جانۋارلار الەمى، ەرتەگىلەر مەن ءتۇرلى وقيعالارعا ارنالعان كىتاپتارعا كوشكەن ءجون.
نازىم ساپاروۆا بالانىڭ كىتاپ وقۋى تەك سوزدىك قورىن مولايتىپ قانا قويماي، ويلاۋ قابىلەتى مەن قيالىنىڭ دامۋىنا دا جول اشادى دەپ ەسەپتەيدى. شىعارمانى وقىعان بالا وقيعا جەلىسىن ءتۇسىنىپ، كەيىپكەرلەردىڭ ارەكەتىن باعالايدى، ءوز بەتىنشە قورىتىندى جاساۋعا داعدىلانادى.
- ءار كىتاپ - ءبىر ۇستاز. ءار شىعارما وقىرمانعا بەلگىلى ءبىر وي سالىپ، ومىردە قانداي شەشىم قابىلداۋعا بولاتىنى جونىندە ويلاندىرادى. كىتاپ وقىعان ادام اقپاراتتىڭ ءبارىن سول كۇيىندە قابىلداماي، ونى سارالاپ، سۇزگىدەن وتكىزە الادى. سوندىقتان بالانىڭ بويىندا ەڭ الدىمەن ويلاۋ قابىلەتىن قالىپتاستىرۋىمىز كەرەك. مەكتەپكە بارعان كەزدە ونىڭ ءبىلىم الۋعا دايىندىعى دا وسىدان باستالادى، - دەيدى ول.
ايتا كەتەيىك، بۇعان دەيىن، كىتاپ وقۋدى كۇندەلىكتى ادەتكە اينالدىراتىن وتاندىق پلاتفورما جايلى جازعان ەدىك.