— مەملەكەت باسشىسى قاسىم-جومارت كەمەل ۇلى توقايەۆ تۇركىستان قالاسىندا وتكەن ۇلتتىق قۇرىلتايدىڭ Ⅱ وتىرىسىندا بەرگەن تاپسىرماسىنا سايكەس «ادال ازامات» ءبىرتۇتاس تاربيە باعدارلاماسى ازىرلەندى. «ادال ازامات» ءبىرتۇتاس تاربيە باعدارلاماسىنىڭ اياسىندا جاڭا حالىقتىق كونستيتۋتسيانىڭ قۇندىلىقتارى، «تازا قازاقستان»، «زاڭ مەن ءتارتىپ»، «ەڭبەك ادامى» يدەولوگەمالارى نەگىزىندە ءبىلىم الۋشىلاردىڭ بويىندا ۇلتتىق جانە جالپى ادامزاتتىق قۇندىلىقتاردى قالىپتاستىرۋعا، مادەني مىنەز-قۇلىق پەن ادەپ نورمالارىن ساقتاۋعا، جاۋاپكەرشىلىك پەن ءوزارا قۇرمەتتى دامىتۋعا باعىتتالعان جۇيەلى تاربيە جۇمىسى جۇرگىزىلىپ جاتىر.
باعدارلامانىڭ نەگىزگى قۇندىلىقتارى - تاۋەلسىزدىك پەن پاتريوتيزم، بىرلىك پەن ىنتىماق، ادىلدىك پەن جاۋاپكەرشىلىك، زاڭ مەن ءتارتىپ، ەڭبەكقورلىق پەن كاسىبي بىلىكتىلىك، جاسامپازدىق پەن جاڭاشىلدىق مەملەكەتتىك جالپىعا مىندەتتى ءبىلىم بەرۋ ستاندارتىنا جانە ءبىلىم بەرۋ ۇيىمدارىنداعى وقۋ-تاربيە پروتسەسىنىڭ مازمۇنىنا ەنگىزىلدى، - دەدى مينيستر.
ونىڭ اتاپ وتۋىنشە، قازىرگى ۋاقىتتا باعدارلاما رەسپۋبليكاداعى بارلىق 20877 ءبىلىم بەرۋ ۇيىمىندا (12066 مەكتەپكە دەيىنگى ۇيىمدا، 8048 مەكتەپتە جانە 763 كوللەدجدە) وقۋ جانە ساباقتان تىس تاربيە جۇمىستارى، سىنىپ جانە كۋرس ساعاتتارى اياسىندا جۇزەگە اسىرىلادى.
— وسى رەتتە، ءبىلىم الۋشىلاردىڭ امانداسۋ ادەبىن قالىپتاستىرۋ ماسەلەسى — ۇلتتىق مادەنيەت پەن ءداستۇردى دارىپتەۋ، ۇلكەندى قۇرمەتتەۋ، كىشىگە ىزەت كورسەتۋ، ءوزارا سىيلاستىق پەن ادەپتىلىك قۇندىلىقتارىن ورنىقتىرۋ تۇرعىسىنان وزەكتى. مەملەكەت باسشىسىنىڭ امانداسۋ ادەبىن ۇلتتىق قۇندىلىقتارعا ساي دامىتۋ جونىندەگى تاپسىرماسى تاربيە جۇمىسىن جەتىلدىرۋگە نەگىز بولادى. بۇگىندە وقۋ-اعارتۋ مينيسترلىگىنىڭ ى. التىنسارين اتىنداعى ۇلتتىق ءبىلىم اكادەمياسى عالىمدار، ساراپشىلار، ازاماتتىق قوعام وكىلدەرىنەن جۇمىس توبىن قۇردى. ءبىلىم الۋشىلاردىڭ امانداسۋ ادەبىنە بايلانىستى ادىستەمەلىك ۇسىنىمدار ازىرلەۋ جۇمىستارى جۇرگىزىلىپ جاتىر، - دەدى جۇلدىز سۇلەيمەنوۆا.
مينيستر اتالعان ۇسىنىمداردىڭ مازمۇنىندا ءبىلىم بەرۋ پروتسەسىنە قاتىسۋشىلاردىڭ، مۇددەلى تاراپتاردىڭ، مەملەكەتتىك ورگانداردىڭ ۇسىنىستارى مەن پىكىرلەرى ەسكەرىلەتىنىن جانە دەپۋتاتتارمەن قوسىمشا تالقىلاناتىنىن اتاپ وتەدى.
بۇعان دەيىن دەپۋتات ەرلان سايىر مەكتەپتەردە امانداسۋ ادەبىن كۇندەلىكتى تاربيە جۇمىسىنىڭ تۇراقتى ەلەمەنتى رەتىندە ەنگىزۋدى ۇسىنعان ەدى.