بۇل تۋرالى ەرسايىن بەكبولاتوۆ ايتتى.
ونىڭ سوزىنشە، مۇنداي ءتاسىل بالا جاساندى ينتەللەكتىنى ءوز بەتىنشە جۇمىس ىستەۋدەن جالتارۋدىڭ جولى ەمەس، ءبىلىم الۋعا كومەكتەسەتىن قۇرال رەتىندە پايدالانۋى ءۇشىن ارنايى ەنگىزىلگەن.
- ءبىز جۇيەنى ءتىپتى «2 2» دەگەن سۇراققا دا دايىن جاۋاپ بەرمەيتىندەي ەتىپ جاسادىق. بۇل نە ءۇشىن قاجەت؟ جاساندى ينتەللەكتىمەن دۇرىس جۇمىس ىستەۋ داعدىسىن قالىپتاستىرۋ جانە بالانىڭ ءوز بەتىنشە دامۋىنا مۇمكىندىك بەرۋ ءۇشىن، - دەدى ەرسايىن بەكبولاتوۆ.
ونىڭ ايتۋىنشا، جۇيە وقۋشىعا بىردەن ناتيجەنى كورسەتپەيدى. الدىمەن تاپسىرمانى ورىنداۋ قاعيداتىن ءتۇسىندىرىپ، شەشىمگە بىرگە كەلۋدى ۇسىنادى.
وسىلايشا جاساندى ينتەللەكت وقۋ بارىسىندا كومەكشى ءرول اتقارادى، ال وقۋشى ماتەريالدى ءوزى ءتۇسىنىپ، جاۋاپتى ءوز بەتىنشە تابۋى قاجەت.
سونىمەن قاتار جاساندى ينتەللەكت وقىتۋدى ءار وقۋشىنىڭ ءبىلىم دەڭگەيىنە قاراي بەيىمدەۋگە مۇمكىندىك بەرەدى. پلاتفورمادا ناقتى وقۋشىنىڭ دايىندىعىن ەسكەرە وتىرىپ تاپسىرمالار قۇراستىرۋ قاراستىرىلعان. ءبىلىم دەڭگەيى ءارتۇرلى بالالارعا كۇردەلىلىگى ءارتۇرلى تاپسىرمالار بەرىلەدى.
بۇعان دەيىن ەرسايىن بەكبولاتوۆ قازاقستاندىق WONK ءبىلىم بەرۋ AI- پلاتفورماسى ەلىمىزدەگى 33 مەكتەپتە پيلوتتىق سىناقتان وتكەنىن ايتقان. پلاتفورما ساباققا دايىندالۋ، ساباق ماتەريالدارىن ازىرلەۋ، تەستىلەۋ، وقۋشىلاردى قولداۋ، اتا-انالارعا ارنالعان سەرۆيستەر جانە مەكتەپ اكىمشىلىگىنە قاجەتتى اناليتيكانى ءبىر جۇيەگە بىرىكتىرەدى.
ايتا كەتەيىك، بىرنەشە پاننەن جىلدىق باعاسى «2» بولعان وقۋشى وقۋ جىلىن قايتا وقۋعا قالدىرىلادى.