وقۋشىلار سەنات قىزمەتىمەن تانىسىپ، دەپۋتاتتارعا سۇراق قويدى
استانا. KAZINFORM - بۇگىن ەلوردالىق وقۋشىلار قازاقستان رەسپۋبليكاسىنىڭ زاڭ شىعارۋشى ورگانى - پارلامەنت سەناتىنا باردى، دەپ حابارلايدى وقۋ-اعارتۋ مينيسترلىگىنىڭ باسپا ءسوز قىزمەتى.
ەكسكۋرسيا سەناتورلار نۇرتورە بايتەلەس ۇلى ءجۇسىپ پەن اينۇر سەرىكپاي قىزى ارعىنبەكوۆانىڭ جەتەكشىلىگىمەن ءوتتى. ولار بالالارعا سەناتتىڭ قىزمەتى، قۇرىلىمى جانە نەگىزگى مىندەتتەرى تۋرالى اڭگىمەلەپ بەردى.
وقۋشىلار جالپى وتىرىس زالىنا، حالىقارالىق كەزدەسۋلەر زالىنا، ەلەكتروندىق مۋزەيگە، باسپا ءسوز ورتالىعىنا جانە كوميتەتتىك تىڭداۋلار مەن دوڭگەلەك ۇستەلدەر وتەتىن كابينەتكە باردى.
- ولار زاڭ شىعارۋ پروتسەسىنىڭ قالاي جۇزەگە اساتىنىن ءوز كوزدەرىمەن كورىپ، سەناتورلارعا سۇراقتار قويىپ، پارلامەنتتىك قىزمەتتىڭ ماڭىزدىلىعىن تەرەڭىرەك ءتۇسىندى، - دەلىنگەن حابارلامادا.
ەكسكۋرسيا شىنايى ازاماتتىق ساباققا اينالىپ، بالالاردى ەل ومىرىنە قىزىعۋشىلىقپەن قاراۋعا شابىتتاندىردى.
وسىعان دەيىن وقۋ-اعارتۋ ءمينيسترى عاني بەيسەمبايەۆ ەلوردالىق وقۋشىلارعا سىنىپ ساعاتىن وتكىزگەنىن جازدىق.