«ساباقتار بالالاردىڭ جاس ەرەكشەلىكتەرى مەن دامۋ دەڭگەيىن ەسكەرە وتىرىپ، بالالاردىڭ ءارتۇرلى ومىرلىك جاعدايلاردا ءوز ءىس-ارەكەتتەرىنە سەنىمدىلىگىن قالىپتاستىرۋعا باعىتتالعان. ءبىزدىڭ مىندەتىمىز - بالالارعا قاجەتتى اقپاراتتى بەرىپ قانا قويماي، ءتۇرلى جاعدايلاردا دۇرىس ارەكەت ەتۋگە ۇيرەتۋ»، - دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
قاۋىپسىزدىك ساباعىندا ءبىرقاتار تاقىرىپتارعا باسا نازار اۋدارىلادى.
بالاباقشاداعى ەرەسەك توپ بالالارى ءۇشىن (4 جاس):
شۇعىل قىزمەتتەر مەن بايلانىس ورتالىقتارىنىڭ تەلەفون نومىرلەرىن ءبىلۋ، شۇعىل قىزمەتكە دۇرىس قوڭىراۋ شالۋ، ءوزى تۋرالى نەگىزگى مالىمەتتەردى ەستە ساقتاۋ، تەرەزەلەرگە بايلانىستى قاۋىپتەردى ۇعىنۋ، سونداي-اق بالالار الاڭدارىندا، ويىن ورتالىقتارى مەن اتتراكسيونداردا ءوزىن-ءوزى ۇستاۋ ەرەجەلەرىن قالىپتاستىرۋ.
باستاۋىش سىنىپ بالالارى ءۇشىن:
سۋ قويماسىنداعى قاۋىپتەر، ەسىكتى قاعۋ كەزىندە قاۋىپتى قالاي تانۋعا بولادى، بەيتانىس ادامدارمەن كەزدەسكەندە قالاي ارەكەت ەتۋ كەرەك، مۇز ۇستىندە ءجۇرۋ قاۋپى، ءوزىن-ءوزى قورعاۋ، ۆيرتۋالدى دوستىقتىڭ قاۋپى جانە قاڭعىباس يتتەر كەزىككەندەگى ساقتىق شارالارى.
ورتا سىنىپ بالالارى ءۇشىن:
قاۋىپتى چەللەندجەر تاقىرىپتارى بويىنشا ساباقتار، بوتەن ادامنىڭ شاقىرۋىن قابىلداماۋ، كوشەدەگى قاۋىپتى نىسانداردان (مىسالى، سۋبۇرقاقتار، ەلەكتر قالقاندارى) اۋلاق ءجۇرۋ، كيبەربۋللينگ جانە ودان قورعانۋ تاسىلدەرى، اتا-انالارمەن سەنىمدى قارىم-قاتىناستىڭ ماڭىزدىلىعى، ينتەرنەتتەگى قاۋىپتەر، سونداي-اق بالانىڭ قۇقىقتارى مەن مىندەتتەرى.
جوعارى سىنىپ وقۋشىلارى مەن كوللەدجدىڭ 1-2-كۋرس ستۋدەنتتەرى ءۇشىن:
الاياقتاردىڭ الداۋىنا تۇسپەۋ جانە وزدەرىن تابىستىڭ كۇماندى تۇرلەرىنەن قورعاۋ، ونلاين-ويىنداردىڭ تاۋەكەلدەرىنەن ساقتانۋ جانە قاۋىپسىزدىكتى قامتاماسىز ەتۋ، تەرىس ەموتسيالار مەن سوزدەرگە قاتىستى دۇرىس ارەكەت ەتۋ، قاۋىپسىز ەڭبەك جاعدايلارى، اتا-انالارعا سەنىم جانە ءوز ارەكەتتەرى ءۇشىن جاۋاپكەرشىلىك الۋ ەرەجەلەرى.
ايتا كەتەيىك، ساباقتار بالالاردى زورلىق-زومبىلىقتان قورعاۋ، سۋيتسيدتىڭ الدىن الۋ جانە ولاردىڭ قۇقىقتارى مەن سالاماتتىلىعىن قامتاماسىز ەتۋ جونىندەگى 2023-2025 -جىلدارعا ارنالعان كەشەندى جوسپارى شەڭبەرىندە جۇرگىزىلەدى.