وقۋشى ءولىمى: اقتوبەدە تاعى ءبىر وقۋشى كۇدىككە ىلىگىپ، قامالدى

اقتوبە. KAZINFORM - تەمىر اۋدانى قوپا اۋىلىنداعى 9-سىنىپ وقۋشىسىنىڭ ولىمىنەن سوڭ الدىمەن ەكى جاسءوسپىرىم قامالدى. قازىرگى كەزدە تاعى ءبىر كامەلەتكە تولماعان بالا كۇدىككە ىلىكتى.

اقتوبە وبلىستىق پوليتسيا دەپارتامەنتى تاعى ءبىر ادامنىڭ كۇدىككە ىلىككەنىن حابارلادى.

- تەمىر اۋدانىنىڭ قوپا اۋىلىندا كامەلەتكە تولماعاندار اراسىندا قاقتىعىس بولىپ، 9 -سىنىپ وقۋشىسى قايتىس بولدى. وسى فاكتى بويىنشا بۇزاقىلىق جانە دەنساۋلىققا قاساقانا اۋىر زيان كەلتىرۋ دەرەگىمەن سوتقا دەيىنگى تەرگەپ-تەكسەرۋ باستالدى. كەزەكشى تاۋلىكتە وسى وقيعانىڭ بارلىق قاتىسۋشىسى انىقتالدى. ولاردىڭ ارەكەتتەرىنە قۇقىقتىق باعا بەرىلەتىن بولادى. جەدەل-تەرگەۋ توبى قۇرىلىپ، قىلمىستىق ءىس اقتوبە وبلىستىق پوليتسيا دەپارتامەنتىنىڭ وندىرىسىنە قابىلداندى. پروتسەسسۋالدىق پروكۋرور تاعايىندالدى. قازىرگى ۋاقىتتا وبەكتيۆتى جانە جان-جاقتى تەرگەۋ شارالارى اتقارىلۋدا. كامەلەتكە تولماعان ءۇش كۇدىكتى ۋاقىتشا ۇستاۋ يزولياتورىنا قامالدى. الەۋمەتتىك مارتەبەسىنە، تۋىستىق بايلانىستارىنا قاراماستان، بارلىق كىنالى ادام جاۋاپقا تارتىلادى. قىلمىستىق ءىس بويىنشا وزگە دە مالىمەتتەر جاريا ەتۋگە جاتپايدى. تەرگەۋ بارىسى پوليتسيا دەپارتامەنتى باستىعىنىڭ باقىلاۋىندا،- دەدى اقتوبە وبلىستىق پ د باستىعىنىڭ ورىنباسارى عالىم بايجانوۆ.

بۇعان دەيىن حابارلاعانىمىزداي، 2-قىركۇيەك كۇنى وقۋشىلار توبەلەسىپ، ءبىر جاسءوسپىرىم كوز جۇمدى.

وسى وقيعادان سوڭ ارنايى جۇمىس توبى قۇرىلدى. سول كۇنى مەكتەپ ديرەكتورى جۇمىستان شىعارىلدى.

- مەكتەپ ديرەكتورى وقيعا بولعانعا دەيىن وتباسى جاعدايىنا بايلانىستى جۇمىستان بوساتۋ جونىندە ارىز جازعان. سول سەبەپتەن ءوز ەركىمەن جۇمىستان شىقتى، - دەدى اقتوبە وبلىستىق ءبىلىم باسقارماسىنىڭ باسشىسى جايىق سۇلتان.