وقۋ- اعارتۋ ءمينيسترىنىڭ بالالارى قانداي مەكتەپتە وقيدى

دۇنيەجۇزىلىك بانك ساراپشىلارىنىڭ قازاقستان وقۋشىلارىنىڭ ساۋاتىنا قاتىستى دەرەگى - جاۋىر بولعان اقپارات. بۇل تۋرالى وقۋ- اعارتۋ ءمينيسترى عاني بەيسەمبايەۆ ايتتى، دەپ حابارلايدى Kazinform اگەنتتىگى.

بۇگىن ۇكىمەت وتىرىسىنان كەيىن ۇيىمداستىرىلعان بريفينگتە ب ا ق وكىلدەرى مينيستردەن «دۇنيەجۇزىلىك بانك ساراپشىلارى قازاقستانداعى مەكتەپ وقۋشىلارىنىڭ 64 پايىزى فۋنكسيونالدىق تۇرعىدا ساۋاتسىز دەگەن ەكەن. بۇل پىكىرمەن كەلىسەسىز بە؟ ءبىلىم ساپاسى مەكتەپتەردە سونشالىقتى ناشار ما؟» دەپ سۇراعان ەدى.

مينيستر مۇنداي تۇجىرىممەن كەلىسپەيتىنىن قاداپ ايتتى.

«جالپى، بۇل پىكىرمەن مۇلدە كەلىسپەيمىن. دۇنيەجۇزىلىك بانكتىڭ ايتىپ وتىرعانى — ەسكىرگەن، جاۋىر بولعان اقپارات. 2018 -جىلدان بەرى كەلە جاتقان دۇنيەلەر. ودان بەرى قانشاما ۋاقىت ءوتتى، ساپانى كوتەرۋ باعىتىندا قانشاما جۇمىس اتقارىلىپ جاتىر. بۇل تۋرالى ءبىز ۇنەمى اشىق ايتىپ وتىرامىز. وقۋشىلارىمىزدىڭ دەڭگەيى وسىنداي دەگەن ءسوزدىڭ شىندىققا جاناسپايتىنىن ايتقىم كەلەدى»، — دەدى عاني بەيسەمبايەۆ.

سونىمەن قاتار ول بالالارىنىڭ ۇيگە جاقىن مەملەكەتتىك مەكتەپتە ءبىلىم الاتىنىن اتاپ ءوتتى.

«قاراپايىم مەكتەپ. مۇعالىمدەرى دە، وقۋ پروتسەسى دە كوڭىلىمنەن شىعادى. قولىم تيگەندە بالالارىمنىڭ ساباعىن قاراپ وتىرامىن. باعاسىن قاداعالاۋ ءۇشىن عانا ەمەس، تۇسىندىرگەن، وقىعان ساباقتارىن جەتكىزۋدە جاقسى قالىپتاسقان ءبىلىمىنىڭ بار ەكەنىن بايقادىم»، — دەدى مينيستر.

اۆتور

مارلان جيەمباي