وقۋ-اعارتۋ ءمينيسترى بەيسەمبايەۆ وزبەكستاننىڭ قازاقستانداعى ەلشىسىن قابىلدادى
استانا. KAZINFORM - وقۋ-اعارتۋ ءمينيسترى وزبەكستاننىڭ قازاقستانداعى ەلشىسى باحتيەر يبراگيموۆتى قابىلدادى، دەپ حابارلايدى مينيسترلىكتىڭ باسپا ءسوز قىزمەتى.
كەزدەسۋدە عاني بەيسەمبايەۆ رەسمي استانا مەن تاشكەنت اراسىنداعى ءبىلىم سالاسى بويىنشا ەكىجاقتى ىنتىماقتاستىقتى ءتيىمدى جالعاستىرۋدىڭ جانە كەڭەيتۋدىڭ ماڭىزدىلىعىن اتاپ ءوتتى.
مينيستر ەكى ەلدىڭ پەداگوگتەرىنىڭ كاسىبي بىلىكتىلىگىن ارتتىرۋ بويىنشا ءوزارا ىقپالداستىق قۇرۋ تۋرالى ۇسىنىسىن ءبىلدىردى.
سونىمەن قاتار، مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ سالاسىنداعى ىنتىماقتاستىقتى ودان ءارى دامىتۋ ماسەلەلەرى تالقىلاندى.
بۇعان دەيىن حابارلاعانىمىزداي، عاني بەيسەمبايەۆ نازاربايەۆ زياتكەرلىك مەكتەپتەرىنە بولىنەتىن قاراجات ازايعانىن ايتقان بولاتىن.
سونىمەن قاتار ق ر وقۋ-اعارتۋ ءمينيسترى جامبىل وبلىسىنداعى مەكتەپكە بوگدە ادامداردىڭ كەلۋى جانە مۇعالىمدەردەن اقشا جيناۋ وقيعاسىنا قاتىستى پىكىر ءبىلدىردى.