چەمپيوناتتىڭ رەسمي اشىلۋ سالتاناتى ءبىلىم جانە عىلىم ءمينيسترى اسحات ايماعامبەتوۆتىڭ قاتىسۋىمەن ءوتتى، دەپ حابارلايدى قازاقپارات ق ر ءبىلىم جانە عىلىم مينيسترلىگىنىڭ باسپا ءسوز قىزمەتىنە سىلتەمە جاساپ.
«قۇرمەتتى ارىپتەستەر، ۇلتتىق چەمپيوناتقا قاتىسۋشىلار! بارشاڭىزدى چەمپيوناتتىڭ باستالۋىمەن قۇتتىقتايمىن!. بىرنەشە جىل بۇرىن ءبىز WorldsSkills الەمدىك قوزعالىسىنا قوسىلىپ، 50-ورىندا تۇراقتاعان ەدىك. قازىردىڭ وزىندە ءبىز الەمدىك رەيتينگتەگى پوزيتسيامىزدى ەداۋىر كۇشەيتىپ، 14-ورىنعا يە بولىپ وتىرمىز. بۇل ايتارلىقتاي جەتىستىك، ءبىراق ءبىز الدىمىزعا بۇدان دا ءورشىل مىندەتتەر قويۋىمىز كەرەك. كەلەسى جىلى شاڭحايدا وتەتىن حالىقارالىق چەمپيوناتتا ءبىز تەحنيكالىق جانە كاسىپتىك ءبىلىم بەرۋدە ۇزدىك كوماندالاردىڭ العاشقى وندىعىنا كىرۋىمىز قاجەت. مەن ستۋدەنتتەرىمىزگە سەنىم ارتامىن. البەتتە، بۇل قول جەتكىزۋگە بولاتىن مىندەت دەپ سانايمىن. سىزدەرگە تولاعاي تابىس پەن جەڭىس تىلەيمىن»، - دەدى مينيستر اسحات ايماعامبەتوۆ قۇتتىقتاۋ سوزىندە.
ءبىلىم جانە عىلىم ءمينيسترى مەملەكەت تەحنيكالىق جانە كاسىپتىك ءبىلىم بەرۋدى دامىتۋعا ەرەكشە كوڭىل بولەتىنىن اتاپ ءوتتى.
پرەزيدەنتتىڭ تاپسىرماسى بويىنشا 2025-جىلعا قاراي بارلىق تىلەك ءبىلدىرۋشى تەگىن تەحنيكالىق جانە كاسىپتىك بىلىممەن قامتاماسىز ەتىلەدى.
«جاس مامان» باعدارلاماسى بويىنشا ەلىمىزدىڭ 180 كوللەدجى زاماناۋي قۇرالدارمەن جابدىقتالدى، ولار ارقىلى ستۋدەنتتەر پراكتيكالىق ءبىلىم مەن داعدىلار الادى. ماتەريالدىق-تەحنيكالىق بازانى نىعايتۋدىڭ ارقاسىندا ءبىز چەمپيوناتتى وتكىزۋ گەوگرافياسىن كەڭەيتتىك. بيىل ول سايىس 8 قالادا وتەدى»، - دەدى اسحات ايماعامبەتوۆ.
«WorldSkills Kazakhstan 2021» رەسپۋبليكالىق چەمپيوناتى 1- قاراشا مەن 10- جەلتوقسان ارالىعىندا نۇر-سۇلتان، الماتى، اقتاۋ، اتىراۋ، كوكشەتاۋ، قوستاناي، قاراعاندى، سەمەي قالالارىنداعى كوللەدجدەر بازاسىندا وتەدى. بارلىعى 18 جارىس الاڭى ۇيىمداستىرىلدى. ەلىمىزدىڭ بارلىق وڭىرىنەن كەلگەن 450 دەن استام جاس مامان 30 نەگىزگى جانە 40 تان استام قوسىمشا قۇزىرەتتەر بويىنشا ءوز داعدىلارىن كورسەتەدى.
ولار كەلەسى بلوكتارعا بولىنگەن: «اقپاراتتىق-كابەلدىك جەلىلەر»، «مەحاترونيكا»، «ينجەنەرلىك گرافيكا CAD» ، «بيزنەسكە ارنالعان IT- شەشىمدەر»، «باستاۋىش سىنىپتاردا وقىتۋ»، «مەكتەپكە دەيىنگى تاربيە»، «موبيلدى روبوتوتەحنيكا»، «جەڭىل اۆتوموبيلدەردى جوندەۋ جانە قىزمەت كورسەتۋ» جانە باسقالار.
قاتىسۋشىلاردىڭ، ياعني كوللەدجدەر مەن ج و و ستۋدەنتتەرىنىڭ، سونداي-اق كاسىپورىندارداعى جاس قىزمەتكەرلەردىڭ جۇمىسىن 500 گە جۋىق ساراپشى باعالايتىن بولادى.
ايتا كەتەيىك، WorldSkills حالىقارالىق قوزعالىسى جۇمىسشى ماماندىقتارىنىڭ بەدەلىن ارتتىرۋعا جانە ولاردى تانىمال ەتۋگە باعىتتالعان ءارى بىلىكتى كادرلاردى دايارلاۋدا جاڭا ترەندتەر جاسايدى. وعان الەمنىڭ 80 نەن استام ەلى قاتىسۋدا.
قازاقستان WorldSkills International (wsi )، WorldSkills Europe (WSE) جانە WorldSkills Asia (wsA ) تولىق قۇقىقتى مۇشەسى بولىپ تابىلادى. بيىل ەۋروپا چەمپيوناتىندا قازاقستاندىق دينا افاناسيەۆا العاش رەت «ۆەب-ازىرلەۋ» قۇزىرەتتىلىگى بويىنشا قولا مەدالعا يە بولدى. قازاقستاننىڭ WSE رەيتينگى 2016-جىلمەن سالىستىرعاندا 20 پوزيتسياعا نىعايىپ، 9 - ورىنعا جەتتى.