World Boxing: بۇگىن نۇرسۇلتان التىنبەك الەم كۋبوگىندا ەل نامىسىن قورعايدى

فوتو: Фото: pixabay.com

استانا. KAZINFORM — بۇگىن برازيليادا بوكستان World Boxing اياسىندا الەم كۋبوگىنىڭ ءبىرىنشى كەزەڭىندەگى العاشقى جارىس كۇنىندە ەل قۇراماسىنان ءبىر سپورتشى شارشى الاڭعا شىعادى.

قازاقستان بوكس فەدەراتسياسىنىڭ حابارلاۋىنشا، ءدۇبىرلى دودا 30-ناۋرىز-6-ءساۋىر ارالىعىندا وتەدى دەپ جوسپارلانىپ وتىر.

العاشقى جارىس كۇنىندە ەرلەر قۇراماسىنان نۇرسۇلتان التىنبەك (55 كەلى) رينگكە شىعادى. قارسىلاسى - برازيليالىق ميشەل تريندادە.

سونداي-اق الەم كۋبوگىندا ەلىمىزدىڭ اتىنان ەرلەر قۇراماسىندا نۇرزات وڭعاروۆ (50 كەلى)، تالعات سىرىمبەتوۆ (60 كەلى)، المات ءابدۋالى (65 كەلى)، دارحان دۇيسەباي (70 كەلى)، دياس مولجىگىتوۆ (80 كەلى)، داۋلەت تولەمىسوۆ (85 كەلى) جانە دانيال ساپارباي (90 كەلىدەن جوعارى) سايىسقا تۇسەدى.

ال ايەلدەر قۇراماسىنان جازيرا وراقبايەۆا (51 كەلى)، انيتا ادىشيەۆا (54 كەلى)، ۇلجان سارسەنبەك (57 كەلى) ەل نامىسىن قورعايدى.

World Boxing ءتۋرنيرى ءۇش كەزەڭنەن تۇرادى. ەكىنشى كەزەڭ 30-ماۋسىم-7-شىلدە ارالىعىندا قازاقستاندا بولادى. ال ءۇشىنشى كەزەڭ 21-27- شىلدە ارالىعىندا وتەدى. ءبىراق ونىڭ وتەتىن ورنى ازىرگە بەلگىسىز.