ونەركاسىپ مينيسترلىگى ەل تۇرعىندارىن كومىردى ەرتەرەك ساتىپ الۋعا شاقىردى

استانا. KAZINFORM - كۇننىڭ سۋىتقانىن كۇتپەي كومىردى ەرتەرەك ساتىپ الۋ قاجەت. بۇل تۋرالى ونەركاسىپ جانە قۇرىلىم مينيسترلىگى ونەركاسىپ كوميتەتى ءتوراعاسىنىڭ ورىنباسارى تۇرار جولماعامبەتوۆ ايتتى.

ونىڭ ايتۋىنشا، حالىقتى جانە كوممۋنالدىق- تۇرمىستىق سەكتوردىڭ كومىرگە دەگەن قاجەتتىلىگى 8,6 ميلليون توننانى قۇرايدى. بۇگىندە ونىڭ 1 ميلليون تونناسى جەتكىزىلگەن.

«تاپشىلىق ورىن الۋى مۇمكىن بە؟ جالپى، كومىر بار. ءبىز الەمدە كومىردى ءوندىرۋ مەن بارلاۋ بويىنشا ۇزدىك 10 ەلدىڭ قاتارىنا كىرەمىز. جىلجىمايتىن قۇرام تولىعىمەن دايىن، پاركتىڭ دە ۇلعايتىلعانى ايتىلدى. جەرگىلىكتى جەرلەردە دە اكىمدىكتەر دايىن وتىر. ەندىگى ماسەلە سۇرانىسقا بايلانىستى. ەگەر، حالىق كۇننىڭ سۋىتقانىن كۇتەتىن بولسا، وندا پروبلاما بولادى. سول كەزدە (تاپشىلىق) كۇتۋىمىز ىقتيمال»، - دەدى تۇرار جولماعانبەتوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ دەرەگىنشە، تەمىر جول تۇيىقتارى كۇنىنە ارى كەتكەندە 100 ماشيناعا عانا كومىر تيەي الادى.

«ال ءبارى كۇن سۋىتقانىن كۇتسە، وندا 500 ماشيناعا دەيىن سۇرانىس بولادى. مۇنداي كولەمگە وپەراتوردىڭ قىزمەتى كورسەتە المايتىندىعى تۇسىنىكتى. سوندىقتان كۇننىڭ سۋىتقانىن كۇتپەي كومىردى ەرتەرەك ساتىپ الۋى ءۇشىن حالىقتىڭ اراسىندا اقپاراتتىق ناۋقان جۇرگىزۋ قاجەتتىگىن ايتىپ وتىرمىز. جالپى، كومىر دە، جىلجىمالى قۇرام دا جەتكىلىكتى. ءبىزدىڭ ەندىگى مىندەتىمىز - كومىر ساتىپ الۋ. قازىر تامىز، قىركۇيەك ايلارىندا تەك تەمىر جول تۇيىقتارىنداعى عانا ەمەس، حالىقتىڭ قولىنداعى دا قوردى ارتتىرۋىمىز قاجەت»، - دەدى كوميتەت ءتوراعاسىنىڭ ورىنباسارى.