ونەر ادامىنىڭ ارمانى مەن ماقساتى باسقا بولادى - سۆەتلانا ايتبايەۆا ديماش تۋرالى ايتتى

الماتى. KAZINFORM - ورتالىق ازيا ايەلدەرىنىڭ فورۋمى بارىسىندا الەمگە ايگىلى ءانشى ديماش قۇدايبەرگەننىڭ اناسى سۆەتلانا ايتبايەۆا بالا تاربيەسىنە قاتىستى اقىل-كەڭەسىن ايتتى.

ءانشىنىڭ اناسى دارىندى بالا تاربيەلەۋدىڭ قۇپياسىمەن ءبولىستى.

«ونەرلى بالانى تاربيەلەۋ قيىن جانە وڭاي. ونەر ادامىنىڭ ارمانى، ماقساتى باسقا بولادى. ەڭ الدىمەن بالانى ءتۇسىنۋ كەرەك. سونداي-اق ونىڭ بويىنداعى دارىندى كورە ءبىلۋ قاجەت. اتا-انالارعا ايتارىم، بالاڭىزدىڭ ونەرگە دەگەن قۇلشىنىسى بولسا، ءاندى سۇيسە، كۇيدى تىڭداي بىلسە، مۋزىكانى جاقسى كورسە، وندا بالانىڭ جاعدايىن جاساڭىز. بارىنشا ءتۇرلى ۇيىرمەلەرگە قاتىستىرۋ كەرەك»، - دەدى «قۇرمەت» وردەنىنىڭ يەگەرى.

سۆەتلانا ايتبايەۆا بالا ارمانىنا سەنۋ كەرەك ەكەنىن تىلگە تيەك ەتتى.

«ديماش كىشكەنتاي كەزىندە تەلەديداردىڭ الدىندا تۇرىپ، دجەكي چانمەن كەزدەسكىم كەلەدى، ونى ومىردە كورگىم كەلەدى دەپ ارماندايتىن. اكتەردىڭ قيمىل-قوزعالىسىن قايتالايتىن. ديماش ءوز ارمانىنا سەندى، بىزدە سەندىك. بىرنەشە جىلدان كەيىن ديماش اڭىز اداممەن كەزدەستى»، - دەدى ول.

سونداي-اق ول بالا تاربيەسىندە اتا مەن اجەنىڭ ءرولى زور ەكەنىن جەتكىزدى.

«ۇلكەن كىسىلەردىڭ تاربيەسىنەن قول ۇزبەۋ كەرەك. مىنە، سول كەزدە عانا ەلجاندى، ۇلتجاندى، ەل ءۇشىن، مەملەكەت ءۇشىن قىزمەت ەتەتىن، جانى دا، رۋحى دا قازاقىلىققا تولى، سونداي ءبىر جاقسى ازامات شىعادى»، - دەيدى ول.

اۆتور
الما مۇقانوۆا