ومىرلىك جار تاڭداۋدا سوزدىك قور ماڭىزدى ءرول وينايدى - زەرتتەۋ

استانا. قازاقپارات - ۇلى بريتانيادا جۇرگىزىلگەن زەرتتەۋگە سايكەس، ەرلى-زايىپتىلاردىڭ سوزدىك قورى ادەتتە ۇقساس بولادى. بۇل كوررەلياتسيا سوزدىك قوردىڭ جۇپ تاڭداۋداعى ماڭىزدى فاكتور ەكەنىن كورسەتەدى. زەرتتەۋ ناتيجەلەرى Languages جۋرنالىندا جاريالاندى. 

زەرتتەۋ جۇرگىزگەن عالىمدار سوزدىك قوردىڭ جۇباي تاڭداۋداعى ءرولىن انىقتاۋعا تىرىستى. ولار ەرلى-زايىپتىلاردىڭ سوزدىك قورىنىڭ سايكەستىگى، سونداي-اق، بۇل فاكتوردىڭ ەرلەر مەن ايەلدەر ءۇشىن ماڭىزىن زەرتتەدى. عالىمدار اسىرەسە ۇزاق نەكە جىلدارىنان كەيىن دە ەرلى-زايىپتىلاردىڭ سوزدىك قورىنداعى ۇقساستىقتار ساقتالاتىنىن انىقتادى.

زەرتتەۋگە ۇلى بريتانيادا تۇراتىن، نەكە ۇزاقتىعى 9 جىلدان 23 جىلعا دەيىنگى 83 اعىلشىن- تۇرىك بيلينگۆالدى جۇپتار قاتىستى. ولارعا اعىلشىن جانە تۇرىك تىلدەرىندەگى سوزدىك قورى دەڭگەيىن تەكسەرەتىن تەست تاپسىرىلدى. ناتيجەلەر كورسەتكەندەي، جۇبايلاردىڭ ءبىر-بىرىمەن سوزدىك قورىنىڭ كولەمى ايتارلىقتاي سايكەس كەلدى: ۇلكەن سوزدىك قورى بار ەر ادام، ادەتتە، وسىنداي ۇلكەن سوزدىك قورى بار ايەلمەن نەكەدە، جانە كەرىسىنشە.

زەرتتەۋشىلەر سوزدىك قوردىڭ كولەمى ينتەللەكت جانە ءبىلىم دەڭگەيىنىڭ سەنىمدى كورسەتكىشى بولۋى مۇمكىن دەپ ءتۇسىندىردى. بۇل فاكتورلار ادامدى جۇباي تاڭداۋدا تارتىمدى ەتەدى، سەبەبى ينتەللەكت پەن ءبىلىم كوپتەگەن باسقا قاسيەتتەردى، مىسالى، رەسۋرستاردى ءتيىمدى پايدالانۋ قابىلەتىن كورسەتەدى.

الايدا، عالىمدار ءوز زەرتتەۋلەرىنىڭ شەكتەۋلەرىن دە اتاپ ءوتتى، سەبەبى زەرتتەۋ تەك اعىلشىن- تۇرىك بيلينگۆالدارى اراسىندا جۇرگىزىلگەن. باسقا مادەني جانە تىلدىك توپتاردا ناتيجەلەر باسقاشا بولۋى مۇمكىن.