پوليتسەيلەر سۋ تاسقىنىندا قالعان قانشا ادامدى قۇتقاردى

استانا. KAZINFORM - ءتارتىپ ساقشىلارى سۋ قورشاۋىندا قالعان تۇرعىنداردى تاۋىپ، قاۋىپسىز جەرلەرگە جەتكىزىپ جاتىر. تولىعىراق ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ ايتىپ بەردى.

«ىشكى ىستەر مينيسترلىگىنىڭ كۇشىمەن بۇگىنگى كۇنگە دەيىن 25 مىڭ ادام ەۆاكۋاتسيالانىپ، ونىڭ ىشىندە 426 ازامات تىكۇشاق تەحنيكاسىمەن قۇتقارىلدى. مىسالى، پەتروپاۆلدا پوليتسەيلەر سۋ قورشاۋىندا قالعان ەگدە جاستاعى كۇزەتشىنى قۇتقاردى. سۋدىڭ قاتتى اعىسى ەر ادامدى قۇرلىقتان الىستاتىپ اكەتكەن. ونىڭ ارىپتەستەرى پوليتسيا قىزمەتكەرلەرىنە جۇگىنىپ، پوليتسيا مايورى جاقسىلىق بايبوسىنوۆ، پوليتسيا كاپيتانى ازات يسايەۆ جانە پوليتسيا سەرجانتى نۇرلان كوكابايەۆ قايىقپەن قاتتى اعىستى ەڭسەرىپ، تۇرعىندى قۇتقاردى. جالپى قۇتقارۋ وپەراتسياسى 8 مينۋتتى قۇرادى» - دەدى شىڭعىس الەكەشەۆ و ك ق-دە وتكەن بريفينگىدە.

سوعان ۇقساس جاعداي باتىس قازاقستان وبلىسىندا دا بولعان. زاشاعان پوليتسيا ءبولىمىنىڭ اعا ۋچاسكەلىك ينسپەكتورى ديدار وتەپوۆ سۋ باسىپ قالعان ءۇيدىڭ توبەسىندە وتىرعان ادامدى قۇتقاردى. انىقتالعانداي، ەر ادام ساياجايدا ەكى كۇن بويى بولعان. كەيىن ونىڭ تەلەفونىنىڭ قۋاتى ءسونىپ قالىپ، ايەلى دابىل قاعىپ، ىزدەي باستاعان.

«اتىراۋ وبلىسىنىڭ قۇلسارى قالاسىندا پوليتسيا مايورى نۇرلان جانگەلوۆ پەن پوليتسيا لەيتەنانتى باۋىرجان تاسەكەنوۆ سۋ قورشاۋىنان 4 بالاسى مەن ايەلدى قۇتقاردى. ءتارتىپ ساقشىلارى بالالاردى كوتەرىپ، قاۋىپسىز جەرگە شىعارعان»، - دەيدى ول.

اۆتور

داۋلەت ىزتىلەۋ