پوليتسەيلەر جۇرگىزۋشىلەرگە پوزيتيۆتى سوزدەر جازىلعان پاراقشالار تاراتىپ، جول ەرەجەسىن ساقتاۋعا شاقىردى

 تۇركىستان وبلىسىنىڭ پوليتسەيلەرى جۇرگىزۋشىلەرگە پوزيتيۆتى سوزدەر جازىلعان پاراقشالار تاراتىپ، جول ەرەجەسىن ساقتاۋعا شاقىردى، دەپ حابارلايدى، Kazinform. 

تۇركىستان وبلىسىنىڭ پوليتسەيلەرى جول-كولىك وقيعاسىنىڭ الدىن الۋ ماقساتىندا جاڭا باستامانى قولعا الدى. كوشەدە كولىكتەردى توقتاتىپ، جۇرگىزۋشىلەرگە پوزيتيۆتى سوزدەر جازىلعان پاراقشالار تاراتتى. سونداي-اق جول ەرەجەسىن ساقتاۋ قاجەتتىگىن ەسكەرتىپ، تۇسىندىرمە جۇمىستارىن جۇرگىزدى. ال جول ەرەجەسىن بۇزباعان اۆتوكولىك يەلەرىنە ەستەلىك رەتىندە ىزگى تىلەكتەر مەن ىقالاستى سوزدەر جازىلعان ەستەلىك بيركالارىن ۇسىندى.

ماسەلەن، پاراقشالاردا «ءسىز - جول ەرەجەسىن قاتاڭ ساقتايتىن جۇرگىزۋشىسىز»، «ءسىز - سۇلۋ دا سىمباتتى جانسىز»، «ءسىز - ارداقتى اتاسىز»، «ءسىز - جول ەرەجەسىن بۇزبايتىن ۇزدىك جۇرگىزۋشىسىز»، «ءسىز - باۋىرمال جانسىز»، «ءسىز - جول قاۋىپسىزدىگىنە كەدەرگى كەلتىرمەيتىن جۇرگىزۋشىسىز» دەگەن جازبالار بار.

كولىك جۇرگىزۋشىلەرى جول پاترۋلدىك پوليتسەيلەرى كولىكتى توقتاتۋعا نۇسقاۋ بەرگەن كەزدە ىشتەي قوبالجۋ بولعانىن ايتتى. ال ىقىلاسقا تولى ەستەلىك پاراقشاسىن ۇسىنعان كەزدە ەرەكشە اسەرگە بولەنگەنىن جەتكىزدى.

اۆتور

قايرات زاينيشەۆ