پوليتسيانىڭ شۇعىل شاقىرۋلارعا ارنالعان 102 بايلانىس جەلىسى — حالىقتىڭ ىشكى ىستەر ورگاندارىنا حابارلاسۋى ءۇشىن ەڭ كوپ پايدالاناتىن بايلانىس ارنالارىنىڭ ءبىرى. ەلىمىز بويىنشا كۇن سايىن ازاماتتاردان شامامەن 12-15 مىڭ ءوتىنىش كەلىپ ءتۇسىپ، وڭدەلەدى.
جىل باسىنان بەرى 4 ميلليون 117 مىڭنان استام ءوتىنىش قابىلدانعان. 102 نومىرىنە كەلىپ تۇسكەن بارلىق قوڭىراۋ اقپاراتتىق جۇيەدە اۆتوماتتى تۇردە تىركەلىپ، پوليتسيانىڭ كەشەندى كۇشتەرى ارقىلى ءتيىستى شارالار قابىلدانادى. بۇل رەتتە بىردە- ءبىر حابارلاما نازاردان تىس قالمايدى.
«پوليتسيانىڭ حالىققا قولجەتىمدىلىگى» قاعيداتىن ىسكە اسىرۋ اياسىندا تۇرعىندار ءۇشىن تىكەلەي 102 تەلەفون نومىرىنەن بولەك، ءوتىنىش قابىلداۋدىڭ قوسىمشا ارنالارى قاراستىرىلعان. اتاپ ايتقاندا، وتىنىشتەردى قابىلداۋدىڭ ومنيكانالدى جۇيەسى، «Police 102» موبيلدى قوسىمشاسى، «SOS» دابىل تۇيمەسى، سونداي-اق «زاڭ جانە ءتارتىپ» سەرۆيسى جۇمىس ىستەيدى.
اتالعان بايلانىس ارنالارى ازاماتتارعا وقيعالار مەن قۇقىق بۇزۋ تۋرالى پوليتسياعا جەدەل حابارلاۋعا مۇمكىندىك بەرەدى. كەلىپ تۇسكەن حابارلامالار وقيعانىڭ سيپاتى مەن بولعان ورنى ەسكەرىلە وتىرىپ، تەكسەرۋ جۇرگىزۋ جانە ءتيىستى شارالار قابىلداۋ ءۇشىن ىشكى ىستەر ورگاندارىنىڭ قۇزىرەتتى بولىمشەلەرىنە جولدانادى.
ايتا كەتەلىك الماتىدا SOS باتىرماسى بار العاشقى تەلەمەديتسينالىق مودۋل ىسكە قوسىلعانى تۋرالى جازعان ەدىك.