پوليتسيا قىزىلوردا- اقتوبە باعىتىنداعى جولدا درونداردى ىسكە قوستى
قىزىلوردا. KAZINFORM - قىزىلوردا وبلىسىندا «قاۋىپسىز جول» جەدەل-پروفيلاكتيكالىق ايلىعى باستالدى.
ايلىقتىڭ العاشقى 4 كۇنىندە 1454 ورەسكەل قۇقىق بۇزۋ دەرەگى تىركەلدى. ونىڭ ىشىندە قاۋىپسىزدىك بەلدىگىن تاقپاۋ، تاسىمالداۋ قاعيدالارىن ساقتاماۋ (299)، جاياۋ جۇرگىنشىلەر جولاعىنان وتپەۋ (104)، مىندەتتى ساقتاندىرۋ زاڭناماسىنىڭ تالاپتارىن ەلەمەۋ (87)، كولىك تىزگىنىندە كەلە جاتىپ ۇيالى تەلەفون پايدالانۋ (75)، مىندەتتى تەحنيكالىق تەكسەرىستەن وتپەۋ (69) سياقتى جاعدايلار ءجيى كەزدەستى. سونىمەن قاتار 137 اۆتوكولىك ايىپ تۇراعىنا قويىلىپ، 48 تەمىر تۇلپاردىڭ مەملەكەتتىك تىركەۋ بەلگىلەرى الىنىپ، جۇرۋىنە شەكتەۋ قويىلدى.
- تالداۋ ناتيجەسى رەسپۋبليكالىق ماڭىزى بار قارابۇتاق- قىزىلوردا- شىمكەنت اۆتوجولىندا، ياعني قىزىلوردا- اقتوبە باعىتىندا جولدىڭ ەكىجولاقتى بولۋى سەبەپتى كولىكتەردىڭ ءبىر- بىرىنەن وزۋعا ۇمتىلۋى، جولدىڭ قاراما- قارسى باعىتىنا شىعىپ كەتۋى سياقتى جاعدايلار كوبەيگەن. وسىعان بايلانىستى ۇشقىشسىز ۇشۋ اپپاراتتارى قولدانىلا باستادى. دروندار ارقىلى 50-گە جۋىق ورەسكەل قۇقىقبۇزۋشىلىق انىقتالدى، - دەدى قىزىلوردا وبلىستىق پوليتسيا دەپارتامەنتى جەرگىلىكتى پوليتسيا قىزمەتى باسقارماسى باستىعىنىڭ ورىنباسارى، پوليتسيا پودپولكوۆنيگى مۇراتبەك ماناتوۆ.
جىل باسىنان بەرى وڭىردە 233 جول اپاتى تىركەلىپ، سونىڭ سالدارىنان 17 ادام كوز جۇمدى. 307 ادام دەنە جاراقاتىن العان.
ايتا كەتەيىك، قىزىلوردا- اقتوبە تاسجولى ەكى جولاقتان تۇرادى جانە بۇل جەردەن جۇك كولىكتەرى كوپ وتەدى. 3 مىڭ كولىككە ارنالعان جولدا قازىر 16 مىڭ كولىك قاتىناپ ءجۇر. وسىعان بايلانىستى دا جول اپاتى تىيىلماي تۇر.
اۆتور
نازەركە سانيازوۆا