پوليتسيا قۇتقارۋشىعا پىشاق كەزەگەن ب ق و تۇرعىنىن ۇستادى

ورال. KAZINFORM - پوليتسەيلەر سۋ تاسقىنىنا بايلانىستى ءوز قىزمەتتىك مىندەتتەرىن اتقارىپ جۇرگەن توتەنشە جاعدايلار ءبولىمىنىڭ قىزمەتكەرىن پىشاقپەن جاراقاتتاعان كازتالوۆ اۋدانى جالپاقتال اۋىلىنىڭ تۇرعىنىن ۇستادى.

بۇل تۋرالى Polisia.kz سايتى جازدى.

«اتالمىش فاكتى بويىنشا سوتقا دەيىنگى تەرگەۋ باستالدى. قۇقىق بۇزۋشى ۋاقىتشا ۇستاۋ يزولياتورىنا قامالدى»، - دەلىنگەن حابارلامادا.

ايتا كەتۋ كەرەك، بۇگىندە ورال قالاسىندا جانە وبلىستىڭ بەس اۋدانىندا كوكتەمگى سۋ تاسقىنىنا بايلانىستى جەرگىلىكتى اۋقىمداعى تابيعي سيپاتتاعى توتەنشە جاعداي جاريالانعان. جەرگىلىكتى اتقارۋشى ورگاندار، توتەنشە جاعدايلار قىزمەتكەرلەرى مەن پوليتسيا سۋدى سورۋ جانە ادامداردى قۇتقارۋ بويىنشا كەشەندى شارالار قابىلداپ جاتىر. جالپى سۋ تاسقىنىنا قارسى جۇمىستارعا 919 قىزمەتكەر مەن 132 قىزمەتتىك تەحنيكا جۇمىلدىرىلدى، ونىڭ 700 دەن استامى پوليتسيا قىزمەتكەرى.

ەسكە سالا كەتەيىك، بۇعان دەيىن باتىس قازاقستان وبلىسى كازتالوۆ اۋدانىندا سۋ تاسقىنىنان زارداپ شەككەن تۇرعىندارعا كومەكتەسۋگە بارعان قۇتقارۋشى پىشاق جاراقاتىن العانىن جازعان ەدىك.