پوليتسيا ەندى قۇقىقبۇزۋشىلاردىڭ كەشىرىم سۇراعان ۆيدەوسىن تۇسىرمەيدى
استانا. KAZINFORM – ق ر ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ ءتۇرلى قۇقىقبۇزۋشىلىق جاساعان ايىپتىلاردىڭ قوعام الدىندا كەشىرىم سۇراۋ تاجىريبەسى ەندى قولدانىلمايتىنىن ايتتى.
«ءبىز جالپى اقپاراتتىق كەڭىستىكتى تالداپ جاتىرمىز. ونىڭ ىشىندە الەۋمەتتىك جەلى پايدالانۋشىلارىنىڭ، حالىقتىڭ پىكىرىن زەرتتەيمىز. قازىر ايىپتىلار جاۋاپقا تارتىلسا دا، پوليتسيا ولاردى كۇشتەپ كەشىرىم سۇراتاتىنداي كورىنەدى. جوق، ولار ءوز ەركىمەن كەشىرىم سۇرايدى. جاعدايدى جەڭىلدەتۋ ءۇشىن ۆيدەوعا تۇسىرىلگەن، ءبىراق بۇل كەرىسىنشە اسەر بەردى. حالىق كەشىرىم سۇراعان ايىپتىلار جازادان سىتىلىپ كەتەدى دەپ ويلايدى»، - دەدى شىڭعىس الەكەشيەۆ ەلوردادا تىلشىلەرمەن كەزدەسۋدە.
رەسمي وكىلدىڭ ايتۋىنشا، ەندى كەشىرىم سۇراعان ۆيدەولار بولمايدى، ونىڭ ورنىنا جاۋاپقا تارتىلعانداردىڭ قوعامدىق جۇمىستاردى قالاي ورىنداپ جاتقانى كورسەتىلەدى.
«وسىلايشا ءبىز جازانىڭ بۇلتارتپاۋشىلىق ءپرينتسيپىن قامتاماسىز ەتەمىز. حالىق ءبارىنىڭ تەڭ ەكەنىن ءبىلۋى كەرەك. ءبىز قۇقىقتىق مەملەكەتتە ءومىر ءسۇرىپ جاتىرمىز.
ءبىز ەشكىمدى كوپشىلىك الدىندا كەشىرىم سۇراۋعا ماجبۇرلەگەن جوقپىز جانە ونداي ۆيدەولار ەندى تۇسىرىلمەيدى. كەشىرىم سۇراعىسى كەلگەندەر ءوز پاراقشاسىندا ءوز باستاماسىمەن جاساسىن. ءبىراق ءبىز ونى پوليتسيامەن بايلانىستىرمايمىز»، - دەيدى ش. الەكەشيەۆ.