پوليسيا ينتەرنەت-الاياقتىقتىڭ جاڭا ءتۇرى تۋرالى ەسكەرتتى

الماتى. KAZINFORM - الماتى قالاسىنىڭ پوليتسيا دەپارتامەنتى تۇرعىنداردى ينتەرنەت-الاياقتىقتىڭ جاڭا ءتۇرى تۋرالى ايتىپ بەردى.

پوليسيا مالىمەتىنشە، جول قوزعالىسى ەرەجەسىن بۇزعانى ءۇشىن جۇرگىزۋشىلەرگە جالعان ايىپپۇل تۋرالى حات كەلىپ، كۇماندى سىلتەمە جىبەرىلەدى.

- قاسكويلەر اۆتوكولىك يەلەرىنە ەلەكتروندىق پوشتا نەمەسە مەسسەندجەرلەر ارقىلى حات پەن حابارلامالار جىبەرەدى. وندا جۇرگىزۋشىنىڭ جەكە دەرەكتەرى، كولىك ءنومىرى جانە «ايىپپۇلدى تولەۋگە ارنالعان» سىلتەمە كورسەتىلەدى. ەگەر ادام بانك كارتاسىنىڭ دەرەكتەرىن ەنگىزسە، الاياقتار ونىڭ ەسەپشوتىنا قول جەتكىزەدى. كەي جاعدايلاردا سىلتەمە ارقىلى جەكە دەرەكتەردى ۇرلايتىن ۆيرۋستار دا تارالادى. مۇنداي شابۋىلدار اقش پەن رەسەيدە تىركەلگەن، ال ەندى ولاردىڭ قازاقستاندا تارالۋ قاۋپى بار»، - دەدى الماتى قالاسى كيبەرقىلمىسقا قارسى كۇرەس باسقارماسىنىڭ باستىعى انەس قالدىبايەۆ.

پوليسيا رەسمي ايىپپۇل تۋرالى حابارلاما تەك 1414 نومىرىنەن كەلەتىنىن جانە ەشقاشان تولەم جاساۋعا ارنالعان سىلتەمە بولمايتىنىن ەسكە سالدى. ايىپپۇلداردى egov.kz, qamqor.gov.kz سايتتارىندا نەمەسە بانكتەردىڭ ءموبيلدى قوسىمشالارى ارقىلى تەكسەرۋگە بولادى.

ەسكە سالايىق، بۇعان دەيىن اتىڭىزعا الاياقتىق كرەديت رەسىمدەلسە، نە ىستەۋ كەرەك ەكەنىن جازعانبىز.