وليمپيادشىلاردىڭ العاشقى لەگى پاريجگە الماتىدان اتتانادى

استانا. KAZINFORM - فرانتسيا استاناسى پاريج قالاسىندا وتەتىن جازعى وليمپيادا ويىندارىنا قازاقستان ۇلتتىق قۇراماسىنىڭ العاشقى لەگى الماتىدان اتتانادى. وسىعان وراي 17-شىلدە كۇنى الاتاۋ بوكتەرىندە سپورتشىلارىمىزدى سالتاناتتى تۇردە شىعارىپ سالۋ ءراسىمى وتەدى.

اتالعان شارا، 17-شىلدە كۇنى ساعات 11:00 دە، الماتى وبلىسى، قاراساي اۋدانىنداعى وليمپيادالىق دايارلىق ورتالىعىندا وتەدى.

ەستەرىڭىزگە سالا كەتەيىك، قازىرگى تاڭدا ءتورت جىلدىق دوداعا جولداما جەڭىپ العان قازاقستاندىق سپورتشىلارىمىز سوڭعى وقۋ-جاتتىعۋ جيىندارىن وتكىزىپ جاتىر. قازاقستان قۇراماسى وليمپيادا ويىندارىنا سپورتتىڭ 25 تۇرىنەن 80 جولداما جەڭىپ الدى. ناقتىراق ايتساق، بوكس، دزيۋدو، سپورتتتىق گيمناستيكا، جەڭىل اتلەتيكا، بايداركا مەن كانوەدە ەسۋ، وقپەن اتۋ، سەمسەرلەسۋ، گرەك- ريم كۇرەسى، ەركىن كۇرەس، ساداق اتۋ، ستەندتىك اتۋ، تەننيس، ۆەلوشوسسە، ءجۇزۋ، زاماناۋي بەسسايىس، تاەكۆوندو، ۆەلوترەك، باتۋت گيمناستيكاسى، بادمينتون، اكادەميالىق ەسۋ، كوركەم گيمناستيكا، ترياتلون، ۇستەل تەننيسى، قۇزعا شىعۋ جانە برەيكينگتەن وليمپيادا ويىندارىندا سىنعا تۇسەدى.

فرانسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىندا وتەدى. ويىندارعا الەمنىڭ 205 ەلىنەن 10500 سپورتشى قاتىسادى دەپ جوسپارلانعان. وندا 32 سپورت تۇرىنەن 329 مەدال جيىنتىعى ساراپقا سالىنادى.

اۆتور

كۇنسۇلتان وتارباي