وليمپيادانى تۇڭعىش رەت ەلىمىزدىڭ بەس بىردەي تەلەارناسى كورسەتەدى

استانا. KAZINFORM - فراتسيا استاناسى پاريج قالاسىندا وتەتىن XXXIII جازعى وليمپيادا ويىندارىن بيىل العاش رەت ەلىمىزدىڭ بەس بىردەي تەلەارناسى كورسەتەدى.

بۇل تۋرالى kazinform تىلشىسىنە ەكسكليۋزيۆ سۇحبات بەرگەن ق ر تۋريزم جانە سپورت ءمينيسترىنىڭ قوعاممەن بايلانىس جانە ب ا ق جونىندەگى كەڭەسشىسى دياس احمەتشارىپ ايتىپ بەردى.

«بيىلعى، ياعني پاريج-2024 وليمپيادا ويىندارىن تۇڭعىش رەت ەلىمىزدىڭ بەس بىردەي تەلەارناسى تىكەلەي ەفيردە كورسەتكەلى وتىر. ول - Qazaqstan ،Qazsport، «حابار»، «ەل ارنا» جانە Jibek Joly تەلەارنالارى. وسى اتالعان بەس ارنا ويىننىڭ رەسمي اشىلۋ سالتاناتىن بىردەي ۋاقىتتا تىكەلەي ەفيردە كورسەتەدى. ال ويىن باستالعاننان كەيىن ءار ارنا جارىستى سپورت تۇرىنە قاراي ءارتۇرلى ۋاقىتتا تىكەلەي كورسەتە باستايدى. قاي ارنا قاي باسەكەنى كورسەتەتىنىن ءوزارا ءبولىسىپ العان. ءبىراق سونىڭ ىشىندە جارىستىڭ باسىم بولىگىن Qazsport تەلەارناسىنان تاماشالاي الاسىزدار. سەبەبى ول - ارنايى مامانداندىرىلعان سپورت ارناسى»، - دەدى ءمينيستردىڭ كەڭەسشىسى.

ەستەرىڭىزگە سالا كەتەيىك، قازىرگى تاڭدا ءتورتجىلدىق دوداعا جولداما جەڭىپ العان قازاقستاندىق سپورتشىلارىمىز سوڭعى وقۋ-جاتتىعۋ جيىندارىن وتكىزىپ جاتىر.

قازاقستان قۇراماسى وليمپيادا ويىندارىنا سپورتتىڭ 25 تۇرىنەن 80 جولداما جەڭىپ الدى.

ناقتىراق ايتساق، ولار بوكس، دزيۋدو، سپورتتتىق گيمناستيكا، جەڭىل اتلەتيكا، بايداركا مەن كانوەدە ەسۋ، وقپەن اتۋ، سەمسەرلەسۋ، گرەك ريم كۇرەسى، ەركىن كۇرەس، ساداق اتۋ، ستەندتىك اتۋ، تەننيس، ۆەلوشوسسە، ءجۇزۋ، زاماناۋي بەسسايىس، تاەكۆوندو، ۆەلوترەك، باتۋت گيمناستيكاسى، بادمينتون، اكادەميالىق ەسۋ، كوركەم گيمناستيكا، ترياتلون، ۇستەل تەننيسى، قۇزعا شىعۋ جانە برەيكينگتەن وليمپيادا ويىندارىندا سىنعا تۇسەدى.

فرانسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىنا بەلگىلەنگەن.

ويىنعا الەمنىڭ 205 ەلىنەن 10500 سپورتشى قاتىسادى.

وندا 32 سپورت تۇرىنەن 329 مەدال جيىنتىعى ساراپقا سالىنادى.

اۆتور كۇنسۇلتان وتارباي