وليمپيادانىڭ كۇمىس جۇلدەگەرى نۇربەك ورالبايعا جەرلەستەرى كولىك سىيلادى

تاراز. KAZINFORM - پاريجدە وتكەن جازعى وليمپيادا ويىندارىندا كۇمىس مەدال يەلەنگەن بىلعارى قولعاپ شەبەرى نۇربەك ورالباي تۋعان جەرىنە تابان تىرەدى. 80 كەلى سالماقتا ونەر كورسەتەتىن سپورتشى جامبىل وبلىسى جامبىل اۋدانى ايشا ءبيبى اۋىلىنىڭ تۋماسى.

بوكستان جالعىز فيناليست اتانعان نۇربەكتى قارسى الۋ شاراسىنا وبلىس اكىمى ەربول قاراشوكەيەۆ، جامبىلدىق سپورتشىلار مەن قالا تۇرعىندارى قاتىستى. سالتاناتتى شارادا وبلىس اكىمى ەربول شىراقپاي ۇلى ەل سەنىمىن اقتاعان نۇربەك بۇگىندە قازاق بوكسىنىڭ ماقتانىشىنا اينالعانىن اتاپ ءوتتى.

«شىن مانىندە، ءتورتجىلدىقتىڭ باستى باسەكەسى سانالاتىن وليمپيا ويىندارىندا جەڭىس تۇعىرىنا كوتەرىلۋ وڭاي ەمەس. ونىڭ بۇل جەتىستىگىنىڭ ارتىندا تالاي جىلدار بويى جاتتىعۋ زالى مەن شارشى الاڭدا توككەن تەرى، اتا-اناسىنىڭ، تۋعان-تۋىسى مەن سپورت جانكۇيەرلەرىنىڭ قولداۋى جانە وزىنە دەگەن سەنىمى جاتىر. وسى رەتتە وعان دۇرىس باعىت-باعدار بەرىپ، ۇنەمى قولداۋ كورسەتكەن جاندارعا العىس ايتقىم كەلەدى. الدىنا بيىك ماقسات قويىپ، ەل ابىرويىن اسقاقتاتقان نۇربەك بولاشاقتا دا جارقىن جەڭىستەرىمەن قۋانتادى دەگەن سەنىم مول»، - دەي كەلە، وبلىس اكىمى سپورتشىعا دەمەۋشىلەر ەسەبىنەن الىنعان «Huyndai Sonata» اۆتوكولىگىنىڭ كىلتىن تابىس ەتتى.

مۇنان سوڭ بوكسشى ىستىق ىقىلاسپەن كۇتىپ العان جەرلەستەرىنە ريزاشىلىعىن جەتكىزدى.

«بۇيىرسا ءتورت جىلدان كەيىن لوس-اندجەلەس قالاسىندا وتەتىن جازعى وليمپيا ويىندارىنا قاتىسسام دەگەن نيەتىم بار. وعان دەيىن باپكەرلەرىممەن اقىلداسىپ، دۇرىس تاكتيكا قۇراتىن بولامىز. وسى جولى تاجىريبەنىڭ ازدىعىنان التىن جۇلدە الۋ باقىتى بۇيىرمادى. مۇحيتتىڭ ارعى جاعىندا وتەتىن ءدۇبىرلى دۇرمەكتە وسىناۋ ولقىلىقتىڭ ورنىن تولتىرىپ، جەڭىمپاز اتانامىن دەپ ويلايمىن»، - دەدى نۇربەك ورالباي.

بۇعان دەيىن ەلدوس سمەتوۆكە جەرلەستەرى Lexus 600 كولىگى مەن 5 بولمەلى پاتەر سىيلاعانىن جازعان بولاتىنبىز.