وليمپيادانىڭ كۇمىس جۇلدەگەرى جازيرا جاپپارقۇل بازاردا جۇمىس ىستەپ ءجۇر مە؟

استانا. KAZINFORM - ريو وليمپياداسىنىڭ كۇمىس جۇلدەگەرى، تانىمال زىلتەمىرشى جازيرا جاپپارقۇل سپورتتان كەيىنگى ءومىرى جايلى Aqyrys Seitqazy YouTube ارناسىنا بەرگەن سۇحباتىندا اشىق ايتىپ بەردى، دەپ حابارلايدى El.kz ينتەرنەت پورتالى.

قازىر ول تۋعان قالاسى شىمكەنتتە كاسىپكەرلىكپەن اينالىسىپ، بازاردا ساۋدا جاساپ جۇرگەنىن ءمالىم ەتتى. كوپشىلىك سپورتشىدان مۇنداي قادام كۇتپەگەنىمەن، جازيرا بۇل تاڭداۋدى سانالى تۇردە جاساعانىن جەتكىزدى.

بازاردا ساۋدا جاسايمىن. ول جەردە ءوزىمنىڭ ادامدارىم تۇرادى. اراسىندا ءوزىم دە بارامىن. اشىپ الىپ، كەتىپ قالۋ دەگەن جوق قوي. باسى-قاسىندا ءجۇرىپ، قاراپ ءجۇرۋىڭ كەرەكسىڭ. بارلىق تاۋاردى ءوزىم تاپسىرىس بەرەمىن، - دەيدى سپورتشى.

كەيبىرەۋلەردىڭ سوزىنە قاراماستان، ول ەڭبەك پەن ادال كاسىپتىڭ ابىرويىن بارىنەن بيىك قويادى.

ساتىپ الۋشىلار كەلگەندە مەنى تانىپ، «سەن بازارعا شىعىپ كەتتىڭ بە؟» دەپ تاڭدانىسپەن سۇرايدى. وندا تۇرعان نە بار؟! مەن بىرەۋدىڭ تاماعىن نەمەسە جۇمىسىن تارتىپ الىپپىن با؟، - دەپ، جازيرا قوعامدا قالىپتاسقان تەرىس كوزقاراسقا قارسى ويىن اشىق جەتكىزدى.

سونداي-اق، سپورتشى قوعامداعى ەكىجۇزدىلىك پەن سىني پىكىرلەرگە دە توقتالىپ ءوتتى.

ءىشىپ كەتسەم «مال بولىپ كەتتى» دەپ ايتادى. وسىنداي جۇمىس ىستەپ جاتساڭ «مىناداي» دەپ ايتاسىڭدار. ولارعا ءتۇزۋ سويلەپ ۇيرەنىڭىزدەرشى دەيمىن. كەيبىر ادامدار «دۇرىس، جارايسىڭ، ساۋدا دا بەرەكە بار» دەيدى. مەنتاليتەتىمىز دۇرىس ەمەس سياقتى. ءىشىپ-شەگىپ جۇرگەنشە، سپورتپەن نەمەسە بيزنەسپەن اينالىسقان دۇرىس، - دەپ ءوز ۇستانىمىن ءبىلدىردى.