وليمپيادادا جۇلدە كۇتكەن ەكى بوكسشى شىمكەنتتەگى تۋرنيرگە قاتىسپايدى

استانا. KAZINFORM - بوكستان 29-قىركۇيەك پەن 5-قازان ارالىعىندا شىمكەنتتە قاراقوزى ابداليەۆتى ەسكە الۋعا ارنالعان حالىقارالىق تۋرنير وتەدى. وعان قازاقستان قۇراماسىنىڭ كەيبىر بەلدى بوكسشىلارى قاتىسپايدى.

بۇعان دەيىن ۇلتتىق قۇرامانىڭ باس جاتتىقتىرۋشىسى قايرات ءساتجانوۆ شىمكەنتتەگى جارىسقا وليمپيادانىڭ كۇمىس جۇلدەگەرى نۇربەك ورالبايدان باسقالارى قاتىسادى دەپ ايتقان ەدى. بۇگىن بەلگىلى بولعانداي، بۇل جارىسقا اسلانبەك شىمبەرگەنوۆ (71 كەلى) پەن قامشىبەك قوڭقابايەۆ (92+ كەلى) تا قاتىسپايدى.

بۇل تۋرالى قازاقستان بوكس فەدەراتسياسىنىڭ رەسمي وكىلى راۋان يگەنيەۆ مالىمدەدى.

ايتا كەتەيىك، ءۇش بوكسشى دا پاريج وليمپياداسىندا باق سىناعان بولاتىن. ولاردىڭ قاتارىنان تەك نۇربەك ورالباي عانا كۇمىس مەدالمەن ورالدى.

پاريج وليمپياداسى اياقتالعان سوڭ بوكستان قازاقستان قۇراماسىندا ۇلكەن وزگەرىستەر ورىن الدى. كوماندانىڭ باس باپكەرى قىزمەتىنە قايرات ءساتجانوۆ كەلىپ، بوكسشىلار الدىنا جاڭا مىندەتتەر مەن تالاپتار قويىلۋدا. جۋىردا عانا قۇرامانىڭ جاڭا كاپيتانى سايلاندى. سونداي-اق كەي بوكسشىلار سالماق دارەجەلەرىن اۋىستىردى.

شىمكەنتتەگى جارىس قورىتىندىسى بويىنشا ازيا چەمپيوناتىنا قاتىساتىن بوكسشىلار ىرىكتەلەدى. سارى قۇرلىقتىڭ باستى بوكس باسەكەسى 30-قاراشا مەن 12-جەلتوقسان ارالىعىندا يوردانيانىڭ استاناسى امماندا وتەدى.