وليمپياداعا 100 كۇن: ەلوردادا بۇقارالىق مارافون وتەدى

استانا. قازاقپارات - 17-ساۋىردە ەلورداداعى «استانا» ترياتلون ساياباعىندا قالا تۇرعىندارى اراسىندا «وليمپياداعا 100 كۇن» اتتى بۇقارالىق جۇگىرۋ شاراسى وتەدى.

استانا قالالىق سپورت باسقارماسى ءمالىم ەتكەندەي، ايتۋلى شاراعا 5 شاقىرىم قاشىقتىقتى باعىندىرا الاتىن بارلىق قالا تۇرعىندارى مەن قوناقتارى شاقىرىلادى.

جاس شەكتەۋى جوق.

ۇيىمداستىرۋشىلاردىڭ ايتۋىنشا ايتۋلى بۇقارالىق جۇگىرۋ شاراسى وليمپيادالىق قوزعالىستى ناسيحاتتاۋ ءارى وليمپياداشالارىمىز بەن ليتسەنزيا الۋعا ۇمىتكەرلەرىمىزدى قولداۋ ماقساتىندا وتپەك.

سونداي-اق، ولار بۇقارالىق جۇگىرۋ شاراسى سپورتتىق جارىس ەمەس ەكەنىن ايرىقشا ايتىپ ءوتتى.

«XXXIII جازعى وليمپيادا ويىندارىنىڭ باستالۋىنا اعىمداعى جىلدىڭ 17-ساۋىرىندە 100 كۇن قالادى. سوعان وراي استانا قالاسى اكىمدىگىنىڭ قولداۋىمەن قالا تۇرعىندارى قاتىسا الاتىن بۇقارالىق شاراسىن وتكىزەمىز. ايتۋلى شارا بۇل جارىس ەمەستىگىن ايتا كەتكىم كەلەدى. بۇل بۇقارالىق جۇگىرۋ. وعان بارلىق تۇرعىندار قاتىسا الادى»، - دەيدى استانا قالاسى اكىمدىگىنىڭ سپورت شارالارىن وتكىزۋ ديرەكسياسىنىڭ باسشىسى باحتيار ماسانوۆ.

تىركەلۋ كەزىندە قاتىسۋشىلارعا لوتەرەيا بيلەتتەرى تاراتىلىپ باعالى سىيلىقتار ويناتىلادى.

ونىڭ ىشىندە: ۆەلوسيپەد، شلەم، بوتەلكەلەر.

قاتىسۋشىلاردى تىركەۋ سول كۇنى ساعات 08.30-دان باستاپ وتەدى.

سونىمەن قاتار، مارەگە جەتكەندەرگە فينيشەر مەدالى بەرىلەدى.

سونداي-اق، ساحنا جانىندا قول كۇرەس، ارقان تارتىس پەن گىر سپورتىنان جارىستار وتەدى.

ايتا كەتەيىك وليمپ ويىندارى 2024 -جىلعى 26-شىلدە مەن 11-تامىز ارالىعىندا فرانسيا استاناسى - پاريجدە وتەدى.

قازىرگى ۋاقىتتا پاريج وليمپياداسىنا قازاقستاندىق قىز-جىگىتتەر 31 جولداما جەڭىپ الدى.

ونىڭ ۇشەۋى استانالىق سپورتشىلاردىڭ ەنشىسىندە.

اۆتور
كۇنسۇلتان وتارباي