وليمپيادا: قازاقستان مەدالدار كەستەسىندە ەكىنشى ورىنعا كوتەرىلدى
پاريج. KAZINFORM - فرانسيا استاناسىندا ءوتىپ جاتقان وليمپيادا ويىندارىندا ەلدوس سمەتوۆتىڭ التىن جۇلدەسىنەن كەيىن قازاقستان جالپى مەدالدار كەستەسىندە بىردەن ەكىنشى ورىنعا كوتەرىلدى.
ءدال قازىرگى ۋاقىتتا جالپى مەدالدار كەستەسىندە قازاقستان قۇراماسى 1 التىن، 1 قولا مەدالمەن جالپى ەسەپتە ەكىنشى ورىندا تۇر.
ءبىرىنشى ورىندا 2 التىن جەڭىپ العان قىتاي قۇراماسى تۇرسا، ەكىنشى ورىنداردى 1 التىن، 1 قولا مەدال جەڭىپ العان قازاقستان، بەلگيا جانە جاپونيا ەلدەرى ءوزارا ءبولىسىپ تۇر. ودان بولەك التىن مەدال جەڭىپ العان ەلدەر قاتارىندا اۆستراليا دا بار. ولاردىڭ ەنشىسىندە ازىرگە 1 التىن جۇلدە بار.
ازىرگە 12 مەملەكەت جۇلدە الىپ ۇلگەرگەن.
ەستەرىڭىزگە سالا كەتەيىك، بۇگىن ەلدوس سمەتوۆ ەل قورجىنىنا العاشقى التىندى سىيلادى.
ايتا كەتەيىك، پاريج قالاسىندا الاۋى تۇتانعان XXXIII جازعى وليمپيادا ويىندارىندا جالپى 32 سپورت تۇرىنەن 329 مەدال جيىنتىعى ساراپقا سالىنادى.
قازاقستان سپورتشىلارى ءتورت جىلدىق دودادا سپورتتىڭ 25 تۇرىنەن 92 جولداما جەڭىپ العان بولاتىن.
اۆتور
كۇنسۇلتان وتارباي