وليمپيادا قارساڭىندا قازاقستان سپورتشىلارى قانداي جەتىستىككە جەتتى، ولقىلىقتار قانداي

ورال. KAZINFORM - بيىلعى 26-شىلدە مەن 11-تامىز ارالىعىندا فرانسيا استاناسى پاريج قالاسىندا XXXIII جازعى وليمپيادا ويىندارى وتەتىنى بەلگىلى.

ءتورت جىلدا ءبىر رەت كەلەتىن دۇنيەجۇزىلىك دودا قارساڭىندا قازاقستان سپورتشىلارى قانداي تابىستارعا قول جەتكىزدى. ولار وليمپ بيىگىنەن كورىنە الا ما، ەل سپورتىنىڭ كەمشىن تۇستارى قانداي؟

مىنە، وسى ساۋالدارعا Kazinform ءتىلشىسى جاۋاپ ىزدەپ كوردى.

قازاقستاندىقتار بوكس، دزيۋدو، كۇرەس جانە باسقا وليمپيادالىق سپورت تۇرلەرىنەن بيىل دا الەمدىك دودالاردا ولجا سالدى.

بيىلعى جىلدىڭ باستى جەتىستىگىنىڭ ءبىرى رەتىندە مىرزاعالي ايتجانوۆ باستاعان ماماندار جاتتىقتىراتىن قازاقستان بوكسشىلارىنىڭ تولىق قۇرامدا پاريج وليمپياداسىنىڭ جولداماسىنا يە بولۋى دەر ەدىك. سوڭعى جولدامانى بانگكوكتا وتكەن ليتسەنزيالىق تۋرنيردە 63,5 كەلى سالماقتا مۇحامەدسابىر بازارباي ۇلى جەڭىپ الدى. بيىلعى جانە ءبىر ەرەكشەلىك، بانگكوككا بارۋ ءۇشىن م. بازارباي ۇلى ەل ىشىندەگى ىرىكتەۋدەن ءساتتى ءوتىپ، جانكۇيەرلەر مەن باپكەرلەردىڭ ءۇمىتىن اقتادى.

وسىلايشا، پاريجدە قازاقستاننان ساكەن بيبوسىنوۆ (51 كەلى)، ماحمۇد سابىرحان (57 كەلى)، مۇحامەدسابىر بازارباي ۇلى (63,5 كەلى)، اسلانبەك شىمبەرگەنوۆ (71 كەلى)، نۇربەك ورالباي (80 كەلى)، ايبەك ورالباي (92 كەلى) جانە قامشىبەك قوڭقابايەۆ (92 كەلىدەن جوعارى) ەل نامىسىن قورعايتىن بولدى. ءوز تاريحىندا ءۇشىنشى رەت تولىق قۇرامدا بارعالى وتىرعان بوكسشىلاردان ءۇمىت كۇتەتىنىمىز انىق. سونىمەن قاتار نازىم قىزايباي (50 كەلى)، كارينا يبراگيموۆا (57 كەلى) جانە ۆالەنتينا حالزوۆا (75 كەلى) جانكۇيەرلەرىن جەرگە قاراتپاس دەپ سەنەمىز. وتكەن جىلعى ازيا ويىندارىنىڭ كۇمىس جۇلدەگەرى اتانعان ك. يبراگيموۆا ليتسەنزيانى بىردەن الىپ، وليمپياداعا ەركىن دايىندالسا، ەل ىشىندەگى ىرىكتەۋدەن ءوتىپ، بانگكوكتا جولداماعا قول جەتكىزگەن ن. قىزايباي مەن ۆ. حالزوۆا دا بارىن سالاتىنى انىق.

سوڭعى جىلدارى جارقىن جەڭىستەرىمەن كوزگە ءتۇسىپ جۇرگەن ءابيبا ءابۋجاقىنوۆا بيىل سول بيىگىنەن تۇسكەن جوق. 48 كەلىگە دەيىنگى سالماقتا ول بىرىككەن اراب امىرلىكتەرىندە وتكەن الەم چەمپيوناتىندا ءوز سپورتتىق جولىندا ەكىنشى رەت قولا جۇلدەگەر اتاندى. ءدال وسى سالماقتا ونەر كورسەتەتىن تاعى ءبىر وتانداسىمىز عاليا تىنبايەۆانىڭ قازاق قىزدارى اراسىندا العاش رەت استانادا وتكەن Grand Slam تۋرنيرىندە چەمپيون اتانۋى كوپشىلىكتى قۋانتتى. ول فينالدىق بەلدەسۋدە پاريج وليمپياداسىنا باراتىن، تاتاميدە ابيبامەن دە كەزدەسىپ، تايتالاسىپ جۇرگەن رەسەيلىك سابينا گيليازوۆانى جەڭدى. وكىنىشكە قاراي، ءار ەلدەن ءاربىر سالماقتا ءبىر عانا سپورتشى قاتىسا الادى.

دزيۋدودان قازاقستان ەرلەر قۇراماسى ساپىندا 60 كەلى سالماقتا وليمپياداعا كىم بارادى دەگەن ساۋال ءبىراز پىكىرتالاس تۋعىزدى. اقىرى رەيتينگىسى ساي كەلىپ تۇرعان ءۇش سپورتشى اراسىندا ەل ىشىندە ىرىكتەۋ بەلدەسۋىن وتكىزۋگە تۋرا كەلدى. مۇندا ماعجان شامشادين مەن نۇرقانات سەرىكبايەۆتى قاپى قالدىرعان ەلدوس سمەتوۆ ءوزىنىڭ ءۇشىنشى وليمپياداسىنا باراتىن بولدى. وسىعان دەيىن كۇمىس پەن قولا جۇلدە العان ەلدوس پاريجدە التىن الامىن دەپ بەكىنىپ وتىر. بيىلعى الەم چەمپيوناتىندا قولا جۇلدە ءۇشىن بەلدەسۋدە ۇتىلىپ، بەسىنشى ورىندى مىسە تۇتقان تاجىريبەلى ە. سمەتوۆ ءوزىنىڭ سوڭعى مۇمكىندىگىن بارىنشا پايدالانارى ءشۇباسىز.

2021-جىلى توكيو وليمپياداسىندا تەننيسشى ەلەنا رىباكينا جۇلدەگە قول سوزىم جەردەن توقتاعان ەدى. الدىمەن جارتىلاي فينالدا شۆەيتساريالىق بەليندا بەنچيچپەن وتكەن ويىندا ءسال-ءپال ساتتىلىك جەتىسپەسە، قولا جۇلدە ءۇشىن باسەكەدە ۋكراينالىق ەلينا سۆيتوليناعا ەسە جىبەرگەن ەدى. سودان بەرى ە. رىباكينانىڭ تاجىريبەسى تولىستى، شەبەرلىگى ارتتى. 2022-جىلى ۋيمبلدون تۋرنيرىنىڭ چەمپيونى اتانسا، وتكەن جىلى اۋستراليا اشىق چەمپيوناتىنىڭ فينالىنا دەيىن جەتىپ، ينديان-ۋەللس پەن مايامي WTA 1000 جارىستارىندا ۇزدىك شىقتى. بيىل بريسبەن مەن شتۋتگارت WTA 500 تۋرنيرىنىڭ چەمپيونى اتانعان ە. رىباكينا رولان گارروستا شيرەك فينالعا دەيىن جەتتى. تەننيستەن وليمپيادا دوداسى توپىراق توسەنىشىندەگى كورتتاردا وتەتىنىن ەسكەرسەك، ەلەنا قازاقستاننىڭ باستى ۇمىتتەرىنىڭ ءبىرى ەكەنى انىق. سونداي-اق بيىل تىم ءتاۋىر ونەر كورسەتىپ، الەمدىك رەيتينگىدە رەكوردتىق 17-ورىنعا دەيىن كوتەرىلگەن الەكساندر بۋبليك پەن 41-ساتىداعى يۋليا پۋتينتسيەۆا نامىستى قولدان بەرە قويماس.

جىلدىڭ باستى وكىنىشىنىڭ ءبىرى رەتىندە ايەلدەر كۇرەسىنەن قازاقستان قۇراماسىنىڭ وليمپيادادان شەت قالۋى دەر ەدىك. الدىمەن بىشكەك قالاسىندا، سودان كەيىن ىستانبۇلدا قازاقستاندىق بالۋان قىزدار بىردە-ءبىر جولداماعا يەلىك ەتە المادى. بىشكەكتە الەم چەمپيوناتىنىڭ ءۇش دۇركىن جۇلدەگەرى ءجاميلا باقبەرگەنوۆا 76 كەلى سالماقتا كوزدەگەن مەجەدەن كورىنە الماسا، ىستانبۇلدا ونىڭ ورنىن باسقان، ريو وليمپياداسىندا ۇزدىك ۇشتىكتەن كورىنگەن ەلميرا سىزدىقوۆا ليتسەنزياسىز قايتتى. باسقا قىزدار دا ءۇمىتتى اقتامادى.

ەركىن كۇرەستەن ىستانبۇلداعى ىرىكتەۋ تۋرنيرىندە راحات قالجان (57 كەلى)، ادلان اسقاروۆ (65 كەلى)، نۇرقوجا قايپانوۆ (74 كەلى) جولدامادان تىس قالدى. ەركىن جانە گرەك-ريم كۇرەسىنەن ليتسەنزياعا قول جەتكىزگەن ازامات داۋلەتبەكوۆ، الىشەر ەرعالي، يۋسۋپ باتىرمۇرزايەۆ، ايدوس سۇلتانعالي، دەمەۋ جادىرايەۆ، نۇرسۇلتان تۇرسىنوۆ، ءالىمحان سىزدىقوۆ سياقتى بالۋاندارعا عانا ءۇمىت ارتامىز. سونداي-اق قازاقستاندىق اۋىر اتلەتتەردىڭ العاش رەت وليمپياداعا قاتىسپايتىنى جەكەلەگەن سپورت تۇرلەرىندە توقىراۋ بار ەكەنىن كورسەتەدى.

بيىل توكيودا وتكەن بايداركا مەن كانوە ەسۋدەن ازيا چەمپيوناتىندا جەڭىمپاز اتانىپ، ليسەنزيا العاندار اراسىندا باتىسقازاقستاندىق ماريا بروۆكوۆا دا بار. وسىعان دەيىن جاس وسپىرىمدەر اراسىندا الەم چەمپيونى، ازيا ويىندارىنىڭ ەكى دۇركىن جۇلدەگەرى اتانىپ ۇلگەرگەن ەسكەكشىنىڭ اناسى ءارى باپكەرى ەلەنا بروۆكوۆانىڭ ايتۋىنشا، قىزى ماريا پاريج وليمپياداسىندا 200 مەتر قاشىقتىقتا جەكەلەي سىندا جانە 500 مەتردە رۋفينا يسكاكوۆامەن بىرگە سىنعا تۇسەدى.

« قىزىم ءقازىر قازاقستان ۇلتتىق قۇراماسى ساپىندا پولشادا دايىندالىپ جاتىر. شىلدە ايىنىڭ ورتاسىندا بولگاريادا 23 جاسقا دەيىنگىلەر اراسىندا الەم چەمپيوناتى وتەدى. وسىنداي دودالاردان جۇلدەمەن ورالىپ، ەل مارتەبەسىن اسىرسا، ءبىزدىڭ دە ارمان-ماقساتىمىزدىڭ ورىندالعانى»، - دەيدى ە. بروۆكوۆا.

كانوە مەن بايداركادان 20 جاستاعى ر. يسكاكوۆا دا وليمپياداعا العاش رەت بارعالى وتىر.

«13 جاسىمدا ەسكەك ەسۋ سپورتىنا كەلگەنىمدە، اعايىندى سەرگەي جانە تيموفەي ەمەليانوۆتار ازيا ويىندارىنىڭ، ازيا چەمپيوناتتارىنىڭ جانە حالىقارالىق جارىستاردىڭ جەڭىمپازى، جۇلدەگەرى رەتىندە ەلىمىزدىڭ داڭقتى سپورتشىلارى بولاتىن. سول كىسىلەرگە قاراپ بوي تۇزەپ، ءىرى جارىستاردىڭ جەڭىمپازى بولۋدى ارماندادىم. بىلايشا ايتقاندا، ەمەليانوۆتار وسى سپورت تۇرىندەگى ۇلگى تۇتار سپورتشىلارىم بولدى»، - دەيدى رۋفينا يسكاكوۆا.

ۇلتتىق قۇرامانىڭ باس باپكەرى قايسار نۇرماعامبەتوۆ رۋفينانى بولاشاعىنان ءۇمىت كۇتتىرەتىن سپورتشىلاردىڭ ءبىرى دەپ ەسەپتەيدى.

«رۋفينا يسكاكوۆا 2021-جىلدان بەرى ۇلتتىق قۇراما ساپىندا جاتتىعىپ كەلەدى. از ۋاقىتتىڭ ىشىندە ۇلكەن ناتيجە كورسەتكەن تالانتتى سپورتشىلارىمىزدىڭ ءبىرى. 2023-جىلى يتاليادا جاستار مەن جاس وسپىرىمدەر اراسىنداعى الەم چەمپيوناتىندا توپ جارىپ، ەل مەرەيىن اسىردى. كوركەم مىنەزدى، كەز كەلگەن قيىندىققا شىدامدى. سونىڭ ارقاسىندا ول ۇلكەن جەتىستىكتەرگە قول جەتكىزىپ كەلەدى»، - دەيدى باس باپكەر.

وسىلايشا، ءبىز ءبىرقاتار سپورت تۇرلەرىنە عانا توقتالدىق. قاي سپورت ءتۇرى بولماسىن، سپورتشىلارىمىز جەڭىس تۇعىرىنان كورىنىپ، كوك بايراعىمىزدى جەلبىرەتىپ، ءانۇرانىمىزدى ورىنداتسا، تۇتاس قازاقستان ءۇشىن ورتاق قۋانىش بولماق. اسىرەسە، قىر استىندا پاريج وليمپياداسى تۇرعان كەزدە.

توكيودا قازاقستان اتىنان 97 سپورتشى سپورتتىڭ 28 تۇرىنەن باق سىناپ، بارلىعى سەگىز قولا الىپ، العاش رەت التىن مەن كۇمىس جۇلدەسىز قالعان ەدى. بيىل سول جاعداي قايتالانباسا ەكەن دەيمىز.