بۇگىن ءماجىلىستىڭ جالپى وتىرىسىنان كەيىنگى باسپا ءسوز ءماسليحاتىندا تىلشىلەر سپورتشى ە. شىناليەۆتىڭ ۇندەۋىنەن كەيىن قۇقىق قورعاۋ ورگاندارى قانداي شارا قابىلداعانىن سۇرادى.
ءوز كەزەگىندە عالىمجان قويگەلديەۆ قىلمىستىق ءىس قوزعالعانىن ناقتىلادى.
- وسىدان ەكى كۇن بۇرىن عانا ادام ۇرلاۋ دەرەگى بويىنشا قىلمىستىق ءىس قوزعالدى. قازىر تەرگەلۋ ساتىسىندا. ءىس ونىڭ ارىزى بويىنشا قوزعالدى، - دەدى باس پروكۋروردىڭ ورىنباسارى.
ايتا كەتەيىك، جاقىندا بەيجىڭ وليمپياداسىنىڭ قولا جۇلدەگەرى ەركەبۇلان شىناليەۆ الەۋمەتتىك جەلىدە ۇندەۋ جاريالاپ، تۇركيادا ونى الدەكىمدەر قورقىتقانى جايىندا ايتقان ەدى.
وسى ورايدا سپورتشى ق ر ىشكى ىستەر مينيسترلىگى مەن باس پروكۋراتۋرادان وسى وقيعاعا قۇقىقتىق باعا بەرۋدى سۇرادى.