وليمپيادا جۇلدەگەرى دەمەۋ جادىرايەۆ پەن ەكى باپكەرىنە اۆتوكولىك سىيعا تارتىلدى
تالدىقورعان. KAZINFORM - جەتىسۋ وبلىسى پانفيلوۆ اۋدانىندا پاريج وليمپياداسىنىڭ كۇمىس جۇلدەگەرى دەمەۋ جادىرايەۆتى جەرلەستەرى زور قۋانىشپەن قارسى الدى. بۇل تۋرالى وبلىس اكىمدىگىنىڭ باسپا ءسوز قىزمەتى مالىمدەدى.
فرانسيادان ەلگە ورالعان بەتتە تۋعان جەرىنە ارنايى اتباسىن تىرەگەن داڭقتى پالۋان جاركەنت قالاسىنىڭ ورتالىق الاڭىندا حالىقتىڭ ىستىق ىقىلاسىنا بولەندى. كەزدەسۋگە مىڭنان استام حالىق جينالدى. سپورتشىنى قارسى الۋعا جەتىسۋ وبلىسى اكىمىنىڭ ورىنباسارى دياس ەسداۋلەتوۆ، اۋدان اكىمى مارات ساعىمبەك، 2008 -جىلعى بەيجىڭ وليمپياداسىنىڭ كۇمىس جۇلدەگەرى، پالۋان نۇرباقىت تەڭىزبايەۆ، ارداگەرلەر، جاستار، جالپى اۋدان تۇرعىندارى كەلدى.
جۇزدەسۋدە سوتسياليستىك ەڭبەك ەرى كۇلاش ايتجانوۆا، اۋداندىق ارداگەرلەر ۇيىمىنىڭ ءتوراعاسى توقتارباي كەرىمقۇلوۆ، سپورتشى نۇرباقىت تەڭىزبايەۆ چەمپيوندى پاريج وليمپياداسىنداعى ايتۋلى جەڭىسىمەن قۇتتىقتاپ، ىزگى تىلەگىن ءبىلدىردى.
تۇرعىنداردىڭ ىقىلاسىنا بولەنگەن د. جادىرايەۆ پاريج تورىندەگى بەلدەسۋ كەزىندە قازاقستاندىق جانكۇيەرلەردىڭ، سونىڭ ىشىندە تۋعان ەلىنىڭ اق تىلەۋى وزىنە كۇش بەرگەنىن ايتىپ، قۇشاق اشىپ قارسى العان جەرلەستەرىنە العىس ايتتى.
«حالىققا، اۋدان تۇرعىندارىنا ريزاشىلىعىمدى بىلدىرەمىن. مەن كوپشىلىكتىڭ قولداۋىن ۇنەمى سەزىنىپ كەلەمىن، سوندىقتان ءار قادامىما جاۋاپكەرشىلىكپەن قارايمىن. بۇدان بىلاي دا سپورتتاعى جولىمدى جالعاستىرىپ، حالىقتىڭ ءۇمىتىن اقتايمىن دەپ سەندىرەمىن»، - دەدى د. جادىرايەۆ.
وسى كەزدەسۋدە دەمەۋگە اۆتوكولىكتىڭ كىلتى سىيعا تارتىلدى. وليمپيادانىڭ كۇمىس جۇلدەگەرىنىڭ العاشقى باپكەرى جۇماحان تۇرعامبەكوۆ پەن جەكە باپكەرى بورانبەك قوڭىراتوۆقا دا اۆتوكولىك كىلتى تابىستالدى.
اتاپ وتسەك، قازاقستاننىڭ ەڭبەك سىڭىرگەن سپورت شەبەرى دەمەۋ جادىرايەۆ 2003-2007 -جىلدارى تالدىقورعان قالاسىنداعى دارىندى بالالارعا ارنالعان سپورت-ينتەرناتىندا وقىعان.
بۇعان دەيىن ول حالىقارالىق تۋرنيرلەر مەن الەم چەمپيوناتتارىنىڭ بىرنەشە مارتە جۇلدەگەرى بولعان. سپورتپەن اينالىسىپ جۇرگەنىنە - 20 جىل.
اۆتور
ەلميرا ورالبايەۆا