وليمپيادا جۇلدەگەرلەرىنەن كەم ەمەس: جامبى اتۋشىلاردى كىم جارىلقايدى
استانا. KAZINFORM - بۇگىن جامبى اتۋدان جارىس كۇنى اياقتالدى. قازاقستان سپورتشىلارى جاقسى ناتيجە كورسەتتى دەۋگە تولىق نەگىز بار.
بۇل رەتتە، Alageum Electric كومپانياسى باسشىلىعى جۇلدە العان سپورتشىلارعا جانە ۇلتتىق قۇرامانىڭ باس باپكەرىنە قوماقتى سىيلىق تابىستاماق.
اتاپ ايتساق، 1-ورىن يەگەرىنە ءبىر بولمەلى پاتەر، 2-ورىن العان سپورتشىعا اۆتوكولىك، 3-ورىن يەلەنگەندەرگە 5 ميلليون تەڭگەدەن ۇلەستىرىلمەك. ال جامبى اتۋدان ۇلتتىق قۇراما باس باپكەرىنە اۆتوكولىك سىيعا تارتىلماق.
«ۇلتتىق سپورتىمىز - جامبى اتۋدى دامىتۋ ءۇشىن ءارى جىگىتتەرىمىزگە جىگەر بەرۋ ماقساتىندا سىياقى تاعايىندايمىن دەپ شەشىم قابىلداعان ەدىم. ەندى، مىنە، ۇلتتىق قۇراما سپورتشىلارى دۇنيەجۇزىلىك كوشپەندىلەر ويىندارىندا ەكى التىن، ەكى كۇمىس، ەكى قولا جۇلدەگە يە بولدى. ەل سەنىمىن اقتاپ، ۇزدىك ناتيجە كورسەتىپ وتىر»، - دەدى Alageum Electric كومپانياسىنىڭ ديرەكتورلار كەڭەسىنىڭ ءتوراعاسى، جامبى اتۋ فەدەراتسياسىنىڭ پرەزيدەنتى ەركەبۇلان ءىلياسوۆ.
وسىلايشا، ءبىر التىن، ءبىر كۇمىس العان باتىر بەكساۋىتقا ءبىر بولمەلى پاتەر بەرىلەدى. ءبىر التىن، ءبىر قولا يەلەنگەن ەرالحان ايكوزگە اۆتوكولىك تابىستالادى. كۇمىس جانە قولا جۇلدە العان ايتبەك سارىبايعا 5 ميلليون تەڭگە اقشالاي سىياقى تارتۋ ەتىلمەك.
ايتا كەتەيىك، جامبى اتۋدان سپورتشىلار ماجار، ازيا، تۇرىك جانە جامبى ستيلىنەن سىنعا تۇسكەن بولاتىن.
اۆتور
ورالحان قوجانوۆ