وليمپيادا جۇلدەگەرلەرىنە قانداي سىيلىقتار بەرىلىپ جاتىر
ءتورتجىلدىقتىڭ باستى دوداسى سانالعان پاريج وليمپياداسى اياقتالدى. قازاقستان قۇراماسى 1 التىن، 3 كۇمىس جانە 3 قولامەن جالپى ەسەپتە 43-ورىنعا تۇراقتادى. كورسەتكىش الدىڭعى توكيو وليمپياداسىنا قاراعاندا جاقسىراق، دەگەنمەن اسىرا ماقتاپ ايتارلىقتاي ەمەس. ەندى سپورتشىلار ەلگە ورالا باستاعان تۇستا ولارعا ءارتۇرلى سىي-قۇرمەت كورسەتىلەتىنى بەلگىلى جايت. وسى تۇستا Kazinform ءتىلشىسى قازاقستاندىق سپورتشىلار ەلدەن قانداي سىي الىپ، مەملەكەت قانشا كولەمدە قارجىلاي قولداۋ كورسەتەتىنىن شولىپ شىقتى.
سپورتشىلار مەن باپكەرلەر 1 ميللياردتان استام اقشا الادى
جالپى، وليمپيادا باستالماي تۇرىپ-اق قازاقستان التىن العان سپورتشىعا - 250 مىڭ دوللار (119 ميلليون تەڭگەدەن اسا) ، كۇمىس مەدال ءۇشىن - 150 مىڭ دوللار (71 ميلليون تەڭگەدەن اسا)، قولا جۇلدەگە - 75 مىڭ دوللار (36 ميلليون تەڭگەگە جۋىق) بەرەتىنى انىق ەدى. جارىستا جۇلدەگەر اتانعان سپورتشىلاردىڭ ەسىمدەرى انىق، مەدالىنىڭ ساناتىنا بايلانىستى اقشالارىن الادى.
ايتپاقشى، مەملەكەت 4-6-ورىن العان سپورتشىلاردى دا قاتاردان قالدىرمايدى. ماسەلەن، 4-ورىن يەلەنگەندەر - 30 مىڭ دوللار، 5-ورىن - 10 مىڭ دوللار جانە 6-ورىنعا تۇراقتاعاندارعا 5 مىڭ دوللار تولەنەدى. مۇندا مەملەكەتتىڭ ەكى ەسە شىعىندانۋعا تۋرا كەلەتىن تۇستارى بار. كوماندالىق جارىستاردا ءاربىر سپورتشى تولىق سومانى الادى. پنيەۆماتيكالىق ۆينتوۆكا اتۋدان كوماندالىق قولا ءۇشىن قازاقستان الەكساندرا لە مەن يسلام ساتپايەۆتىڭ ءارقايسىسىنا 75 مىڭ دوللاردان ۇلەستىرەدى. ياعني، ەكى سپورتشى بىرلەسىپ قورجىنعا ءبىر قولا مەدال سالعانىمەن، اربىرىنە بەلگىلەنگەن مولشەردە اقشا بەرىلىپ، مەملەكەت 150 مىڭ دوللارعا شىعىندالادى.
سوندا قازاقستان 1 التىنعا - 250 مىڭ دوللار، 3 كۇمىسكە - 450 مىڭ دوللار، 3 قولاعا - 300 مىڭ دوللار، 5-ورىن يەلەنگەن 6 سپورتشىعا - 60 مىڭ دوللار، 6-ورىن العان 6 سپورتشىعا - 30 مىڭ دوللار بەرەدى. سوندا بارلىعى 1 ميلليون 90 مىڭ دوللار.
بۇدان بولەك، اقشالاي سىيلىقتان جۇلدەگەرلەردىڭ باپكەرلەرى دە قاعىلمايدى. مىسالى، وليمپيادا چەمپيونى اتانعان ەلدوس سمەتوۆتىڭ 3 باپكەرى بار - العاشقى، جەكە جانە ۇلتتىق قۇراماداعى. ولارعا دا جالپى سوماسى 250 مىڭ دوللار بەرىلەدى. ەگەر ءبارىن سانامالاپ وتىرار بولساق، سپورتشىلار مەن باپكەرلەر ءۇشىن مەملەكەت تەڭگەمەن ەسەپتەگەندە 1 ميللياردتان استام سوماعا شىعىندالاتىنىن كورەمىز.
دەگەنمەن بۇلاردى سىي- قۇرمەتتىڭ العىشارتى دەپ تۇسىندىرسەك بولادى. ويتكەنى فەدەراتسيا مەن سپورتشى تۋىپ- وسكەن ءوڭىردىڭ اكىمدىكتەرى دە بەرەتىن ماراپاتتار جەتەرلىك. قالتالى ازاماتتار دا ءوز اتىنان قالاعانىنشا قۇرمەت كورسەتەدى.
جىلقى، ساعات، پاتەردەن باستاپ قىمبات كولىكتەر بار
قازاقستان اتىن الەمگە تانىتىپ، ءۇش وليمپيادا بويى جۇلدەگەر اتانىپ، كەيىنگىسىندە چەمپيون بولعان ەلدوس سمەتوۆ ەلگە كەلە سالا مەملەكەت بەرەتىن قارجىلاي قولداۋدان بۇرىن كوپتەگەن سىيعا يە بولدى. اۋەلى تۋعان جەرى تارازدان 5 بولمەلى پاتەر بەرىلدى. كوپ ۇزاماي جامبىل وبلىسىنىڭ اكىمى ەربول قاراشوكەيەۆ وليمپيادا چەمپيونىنا پاتەر مەن Lexus Lx 600 كولىگىنىڭ كىلتىن تابىس ەتتى. چەمپيوننىڭ باپكەرى عالىمجان جىلگەلديەۆ دە ماراپاتسىز قالماي، 2 بولمەلى پاتەر مەن Hyundai Santa Fe كولىگىنىڭ كىلتىن الدى. ەلدوستىڭ الارى مۇنىمەن بىتپەيدى. قازاقستاندىق تانىمال كاسىپكەر جۇمابەك جانىقۇلوۆ پەن ءماجىلىس دەپۋتاتى رۋسلان بەردەنوۆ پاريجدە التىن العان ەلدوس سمەتوۆكە كولىك سىيلاعىسى كەلەتىنىن العاش بولىپ مالىمدەگەن. ال اقتوبەلىك كاسىپكەر ءانۋار اقمىرزا ۇلى وليمپيادا چەمپيونىنا قۇنى 100 ميلليون تەڭگە بولاتىن 100 اسىل تۇقىمدى جىلقى سىيلادى. ايتپاقشى، سمەتوۆ سىيعا العان ەكىنشى كولىگىن العاشقى باپكەرى احمەت جۇماعۇلعا بەرگەن.
پاريج وليمپياداسىندا گرەك-ريم كۇرەسىنەن 77 كەلى سالماقتا كۇمىس جۇلدە يەلەنگەن دەمەۋ جادىرايەۆقا كورسەتىلىپ جاتقان قوشەمەت ەرەكشە ەكەنىن بايقادىق. جەتىسۋ وبلىسىنىڭ اكىمى بەيبىت يسابايەۆ سپورتشىعا «جەتىسۋ وبلىسىنىڭ قۇرمەتتى ازاماتى» توسبەلگىسىن تاقتى. اناسى كۇليپا بيجانوۆاعا سالتاناتتى تۇردە قۇرمەت كورسەتىپ، جاركەنت قالاسىنان جاڭا ءۇيدىڭ كىلتىن تابىستادى. ال تۋعان جەرى پانفيلوۆ اۋدانىندا سپورتشىعا Toyota Land Cruiser 300 مىنگىزىپ، 50 000 دوللاردى قولىنا ۇستاتتى. ودان بولەك، الدىنا 1 ءۇيىر جىلقى سالىپ بەردى. سپورتشىنىڭ العاشقى باپكەرى جۇماحان تۇرعامبەكوۆ پەن جەكە باپكەرى بورانبەك قوڭىراتوۆقا Haval كولىگىن مىنگىزدى.
ال بوكستان كۇمىس جۇلدەگە قول جەتكىزگەن نۇربەك ورالبايعا كاسىپكەر الماس جالي التىن ساعات سىيلاپ ۇلگەردى. دەگەنمەن بۇل سىي سپورتشى كورەتىن قۇرمەتتىڭ العىشارتى عانا بولۋى مۇمكىن. سەبەبى بوكسشىعا سىي كورسەتكىسى كەلەتىندەردىڭ قاراسى قالىڭ ىسپەتتى. ونىڭ ۇستىنە فرانسيادان ەلگە ورالعانىنا كوپ بولا قويمادى.
دەسەك تە ايتارلىقتاي قوماقتى سىيلىق الماعاندار دا بار. سونىڭ ءبىرى - سپورتتىق گيمناستيكانىڭ ات سناريادىنداعى جاتتىعۋىندا كۇمىس جۇلدەگەر اتانعان ناريمان قۇربانوۆ. العاشىندا ەلگە كەلگەندە وعان 1 ميلليون تەڭگەلىك سەرتيفيكات تابىستالعان ەدى. ازىرگە سپورتشى ودان باسقا سىيلىق الماعانىن ايتىپ، الداعى ۋاقىتتا جۇلدەگەر سپورتشىلاردىڭ پرەزيدەنتپەن كەزدەسۋىنەن كەيىن ەلەنۋى مۇمكىن ەكەنىن جەتكىزىپتى.
پاريج وليمپياداسىندا ەل نامىسىن قورعاپ، قازاقستان قورجىنىنا قولا تۇسىرگەن دزيۋدوشى عۇسمان قىرعىزبايەۆقا الماتى قالاسى دزيۋدو فەدەراتسياسىنىڭ پرەزيدەنتى الي حامحويەۆ پەن قر دزيۋدو فەدەراتسياسىنىڭ ۆيتسە- پرەزيدەنتى ەرجان زايدينوۆ Toyota Land Cruiser Prado 250 كولىگىن سىيلادى. بۇعان قوسا ارميا سپورتشىسى قىرعىزبايەۆقا مەرزىمىنەن بۇرىن «كاپيتان» اسكەري اتاعى بەرىلدى. اعا لەيتەنانت عۇسمان قىرعىزبايەۆ ءقازىر قورعانىس مينيسترلىگىنە قاراستى ورتالىق سپورت كلۋبىنىڭ اسكەري قىزمەتشىسى.
ال تاعى قولانى العان بوكسشى نازىم قىزايباي دا ەلگە الدەقاشان ورالعان. ءبىراق قانداي تارتۋ كورگەنى ءالى بەيمالىم. ءبىراق بۇعان دەيىن سپورتشى تۇراتىن كوشەدە جوندەۋ جۇمىستارى باستالعانى تۋرالى اقپارات تاراعان ەدى. كوپ ۇزاماي الماتى وبلىسىنىڭ قاراساي اۋداندىق اكىمدىگى بۇل اقپاراتتى جوققا شىعاردى. ءۇشىنشى قولا - تاريحي جۇلدە العان مەرگەندەر الەكساندرا لە مەن يسلام ساتپايەۆقا دا قانداي سىي جاسالعانى ازىرگە بەلگىسىز. قارۋلى كۇشتەر ساپىندا قىزمەت اتقاراتىن يسلام ساتپايەۆقا قورعانىس ءمينيسترى «ەل قورعانى» مەدالىمەن ماراپاتتاعانى بەلگىلى بولدى. ءبىراق ناگرادا ازىرشە سالتاناتتى تۇردە تابىستالعان جوق.
جۇلدە الماسا دا سىي العاندار
بەلگىلى ءبىر مەدال الىپ، تۇعىرعا شىعىپ، تۋ كوتەرمەسە دە ونەرىن كوپشىلىكتى ءتانتى ەتكەن سپورتشىلار بار. ءوز كەزەگىندە ولار دا قۇر قول قالىپ جاتقان جوق. مىسالى، دزيۋدودان ايەلدەر اراسىندا 48 كەلى سالماقتا جۇلدەگە ءبىر تابان جاقىن بولىپ، قولا جۇلدەگە تالاستا ەسە جىبەرگەن ءابيبا ءابۋجاقىنوۆاعا ءماجىلىس دەپۋتاتى ايداربەك قوجانازاروۆ «ەلدىڭ اتىنان» دەپ Kia كولىگىن سىيعا تارتتى.
ال پاريج وليمپياداسىندا 63,5 كەلى سالماق دارەجەسىندە ەل نامىسىن قورعاعان بوكسشى مۇحامەدسابىر بازارباي ۇلىنا اۋىلداستارى ات مىنگىزگەن. نەگىزى بازارباي ۇلى جارىستىڭ باسىنان باستاپ جاقسى ونەر كورسەتىپ، جۇلدەگە دامەلى فاۆوريتتەر قاتارىندا بولعان ەدى. شاماسى، اۋىلداستارى بۇل ەڭبەكتى ەسكەرگەنگە ۇقسايدى.
سونداي-اق پاريج وليمپياداسىندا سپورتتىق گيمناستيكادان 5-ورىن العان ۇلتتىق قۇراما مۇشەسى ميلاد كاريمي دە 1 ميلليون تەڭگەلىك سەرتيكاتقا يە بولعان. سپورتشى سول كەزدە كەلەسى وليمپيادا جەڭىمپاز اتانۋعا ۇمتىلاتىنىن ايتقان بولاتىن.
قازاقستاننىڭ ۇستەل تەننيسى فەدەراتسياسى پاريج وليمپياداسىندا شەبەرلىك تانىتىپ، مىقتىلارمەن يىق تىرەستىرە بىلگەن كيريلل گەراسيمەنكونى ماراپاتسىز قالدىرماي، ەكى بولمەلى پاتەر بەردى. سەبەبى گەراسيمەنكو ەرلەر اراسىنداعى جەكەلەي سىندا 9-ورىندى يەلەندى. بۇعان دەيىن قازاقستاندىق ۇستەل تەننيسى شەبەرلەرى اراسىندا مۇنداي ناتيجەگە قول جەتكىزگەندەر جوق.
اۆتور
ماديار تولەۋوۆ