ۆولەيبولشىلارىمىزدىڭ پاريج وليمپياداسىنا قاتىسۋعا مۇمكىندىگى قالعان جوق - ەرمەك مارجىقپايەۆ

تۋريزم جانە سپورت ءمينيسترى ەرمەك مارجىقپايەۆ ۆولەيبول فەدەراتسياسىنىڭ باسشىلارىمەن جانە جاتتىقتىرۋشىلار شتابىمەن كەزدەسۋ بارىسىندا اتالعان سپورت تۇرىنەن پاريج وليمپياداسىنا قاتىسۋعا مۇمكىندىك قالماعانىن اتاپ ءوتتى، دەپ حابارلايدى Kazinform ۆەدومستۆونىڭ باسپا ءسوز قىزمەتىنە سىلتەمە جاساپ.

جيىن بارىسىندا فەدەراتسيا وكىلدەرى ۆولەيبولدان ۇلتتىق قۇرامالاردىڭ 2023-جىلعى ناتيجەلەرىن قورىتىندىلاپ، الداعى جارىستارعا دايىندىق جوسپارىن تانىستىردى.

قازاقستاندا ۆولەيبول بۇقارالىق سپورت ءتۇرى رەتىندە كەڭ قانات جايىپ كەلەدى. بۇگىندە رەسپۋبليكا بويىنشا 14 مىڭ ۆولەيبول سەكتسياسى جۇمىس ىستەيدى. وندا 600 مىڭنان استام بالا اتالعان سپورت تۇرىمەن تۇراقتى شۇعىلدانادى.

ۆولەيبولدان قازاقستان ۇلتتىق قۇراماسى ەڭ كەيىنگى ءىرى جارىستا سۇرەڭسىز ونەر كورسەتىپ، جۇلدەگەرلەر قاتارىنان كورىنە المادى. ەسەسىنە، جاعاجاي ۆولەيبولىنان ەل قۇراماسى ءۇشىنشى ورىنعا تابان تىرەدى. ۆولەيبول بويىنشا بيىلعى پاريج وليمپياداسىنا جولداما بەرەتىن بارلىق ىرىكتەۋ تۋرنيرى اياقتالدى.

«ۆولەيبولشىلارىمىزدىڭ حالىقارالىق ارەنادا كورسەتىپ جۇرگەن ناتيجەلەرى كوڭىل كونشىتپەيدى. كلۋبتار اراسىنداعى بىرىنشىلىكتەردى ەسەپكە الماعاندا، جەرلەستەرىمىز بىرنەشە جىلدان بەرى ازيا چەمپيوناتتارىندا جۇلدەگەرلەر قاتارىنان كورىنە الار ەمەس. ەرلەر اراسىنداعى ۇلتتىق قۇرامامىز ەڭ كەيىنگى رەت 2017-جىلى، ايەلدەر 2005-جىلى كۇمىس مەدال جەڭىپ العان بولاتىن. پاريجدەگى وليمپيا ويىندارىنا قاتىسۋ ءۇشىن ءبىز الەمدىك رەيتينگتە توپ-5 قۇرامانىڭ قاتارىنا ەنۋىمىز كەرەك ەكەنى بەلگىلى. الايدا، قازىرگى تاڭدا ايەلدەر قۇراماسى الەمدىك رەيتينگتە 32- ءشى، ال ەرلەر قۇراماسى 59-ورىندا تۇر. ياعني، ۆولەيبول سپورتى بويىنشا بىزدە پاريج وليمپياداسىنا قاتىسۋعا مۇمكىندىك جوق دەپ ايتۋعا بولادى»، - دەدى ەرمەك مارجىقپايەۆ.

ءوز كەزەگىندە ۆولەيبول فەدەراتسياسىنىڭ وكىلدەرى اتالعان سپورت تۇرىندەگى نەگىزگى پروبلەمالار تۋرالى ايتتى. سولاردىڭ ءبىرى - ۇلتتىق كوماندانىڭ جاس ەرەكشەلىگى. قازىرگى ۋاقىتتا كوماندانىڭ نەگىزىن 30 جاستان اسقان سپورتشىلار قۇرايدى. سونداي-اق سپورت فۋنكتسيونەرلەرى ەلىمىزدەگى ۇلتتىق ليگانىڭ دەڭگەيى تومەن ەكەنىن، الەمدىك دەڭگەيگە سايكەس كەلمەيتىنىن ايتتى.

جيىن بارىسىندا مينيستر فەدەراتسيا باسشىلىعىنا ۆولەيبولمەن شۇعىلداناتىن وڭىرلەردىڭ قاتارىن كوبەيتىپ، ونى كەڭىنەن دارىپتەۋدى، سونداي-اق قازاقستاننىڭ حالىقارالىق سپورت ۇيىمدارىنداعى وكىلدىگىن ارتتىرۋ بويىنشا جۇمىس جۇرگىزۋدى تاپسىردى. فەدەراتسيادان جەرگىلىكتى بىرىنشىلىكتىڭ دەڭگەيىن كوتەرۋ تالاپ ەتىلدى. سونداي-اق ۆەدومستۆو باسشىسى جاس سپورتشىلاردى دايارلاۋدا جاڭا تاسىلدەردى ەنگىزۋ قاجەتتىگىن ايتتى.

اۆتور كۇنسۇلتان وتارباي